蘇永康醉癲婚照玩殘兄弟團
下周二在港搞百萬婚禮迎娶女友的蘇永康，早前與準蘇太、許志安、張衞健及梁漢文等兄弟團拉隊到美國拉斯維加斯拍攝破格搞笑婚紗相，學足荷里活電影《醉爆伴郎團》的啜核放縱橋段，玩轉賭城！
蘇永康與太太及一班兄弟為婚照玩轉賭城，其中更到Little White Chapel取景。
一班兄弟飲到癲，健仔High到將香檳倒在錢國偉的頭上！
安仔不遑多讓，醉後除鞋晒腳板，難得其他兄弟唔嫌有味繼續劈！
除了搞鬼婚照，蘇永康與太太亦有拍攝靜態一面。
蘇永康返到酒店繼續玩，由梁漢文邊飲酒邊扮證婚。
歌手蘇永康與時裝品牌高層女友馮翠珊（Anita）將於下周二在香港洲際酒店筵開49席，大搞百萬豪華婚宴，結束八年愛情長跑！「愛妻號」蘇永康心知未婚妻對美國拉斯維加斯情有獨鍾，故早前趁與BIG FOUR三子到當地舉行巡唱時，順道邀請鄧建明（Joey）與錢國偉等好友客串拍攝婚紗相。一向愛搞新意思的他破格以荷里活熱爆電影《醉爆伴郎團》（The Hangover）系列作婚照概念，與兄弟團玩轉賭城！
梁漢文扮神父
《醉》片系列講述準新郎與一班伴郎到拉斯維加斯搞婚前派對，最終因飲到醉醺醺而留下一堆「蘇州屎」。準蘇氏伉儷與一班好友決定模仿片中情節，於大型豪華轎車中喪隊香檳玩到癲！期間，玩到興起的張衞健、梁漢文（Edmond）及蘇永康「瞄準」錢國偉，將香檳倒在其頭上！而醉意甚濃的許志安不但捉實Joey逼飲香檳，最後更玩到除鞋晒腳板！其後，一行人移師到酒店房間繼續整古做怪，飲到面紅紅的梁漢文化身證婚神父，邊證婚邊隊酒！《醉》片一幕講到伴郎之一在Little White Chapel與首次見面的陌生女子結婚，一對準新人亦跟足到此著名景點取景。
對於被委派做證婚神父，Edmond指影得開心：「過去前阿公（蘇永康）已經計劃晒，佢哋希望婚紗相係有一輯咁嘅Feel（醉爆），所以我就執咗件類似神父衫嘅長皮褸過去。」當日分別在室內模擬教堂景及大型豪華轎車拍攝，他自爆雖邊影邊飲酒，但其實冇飲醉：「我哋係專業人士！大家好投入幫佢哋影，當日啱啱係BIG FOUR巡迴騷最後一站，咪飲吓酒，既寓工作於影婚紗相，又可以娛樂吓。」對於老友熱心幫忙，蘇永康大表感激，讚兄弟們完騷後不惜捱通宵，連人帶妝集合影相！他又承認當時「眾人皆醉我獨醒」：「成班友仔的確係真飲，哈哈！陪我哋影完後返酒店仲繼續飲到天光，但我同老婆之後要去沙漠影相，又包咗個摩天輪影夜景，所以我哋就冇飲。」
禮服一套到尾
雖然蘇永康出名貪靚，但他笑言婚禮當日會「一衫走天涯」，反而請大家密切留意Anita當日所穿的婚紗，事關該套婚紗從未曝光，更由名設計師度身訂造，難怪他笑言太太的排場比他開個唱更厲害！
