「校長」譚詠麟（阿倫）為慶祝入行四十年，昨晚錄影節目《譚詠麟笑唱人生40年》，圈中好友曾志偉、鍾鎮濤、李克勤、林子祥、徐小鳳及鄺美雲等到場支持。志偉說：「諗唔到咁都過到40年，真戥佢開心！可以紅咁多年、又賺咁多錢又做咁多善事，但又冇請人食一餐飯、冇請過一次旅行。（最欣賞佢邊方面？）佢守錢守得好緊，身家難以估計，可能佢自己都唔知幾多，我估緊佢多啲定成龍多啲。」阿倫得知被批「守財」後，即還擊說：「嘩！守得過佢？佢有冇埋過單呀？每次一埋單就扮飲醉，佢已經係黐飲黐食大家庭主席，佢識咁多富豪，唔使理我哋啦！（你身家多定成龍多？）唔好講呢啲嘢。（錢多到孫都夠用？）唔好咁講，辛苦錢。」

阿倫（左）與志偉互寸，發揮搞笑本色。

身為「溫拿」戰友，當然要到場撐阿倫！

鄭文雅帶相機幫阿倫即場拍照。

徐小鳳（圖）及李克勤現身支持。

李克勤

關楚耀為阿倫整理衣領，認真乖仔！

同場鍾鎮濤笑言阿倫為人「知慳識儉」，大爆他當年登台前鬆高鞋甩踭，在當地買了「阿伯鞋」頂檔，還着了個多月仍未丟。而鄭文雅帶備相機為阿倫即場拍照：「唔可以低炒影佢，因為佢發福咗，平時佢食一餐係我一星期分量。」