龍劍笙淚謝支持再加五場

粵劇名伶龍劍笙為紀念恩師任劍輝逝世25周年，從加拿大返港演出折子戲《任藝笙輝念濃情》，前晚是尖沙咀文化中心首十場演出的最後一場，全場爆滿！連日來落力演出的阿刨狀態大勇，觀眾看得如癡如醉，完場時更不停揮動螢光棒及高呼「安歌」。眾演員第四度出場謝幕時，主辦單位新娛國際負責人丘亞葵即場宣布，繼12月11日於香港演藝學院加演十場後，再度加演12月23至27日最後五場，合共演出25場。

騷後五度謝幕

丘亞葵說：「呢一年多以嚟籌備演出，面對好多問題要解決，阿刨比任何人承受嘅壓力都重，我幫到嘅就係認真喺製作上做好。演出期間，唔少觀眾表示買唔到飛，前兩晚我查詢演藝學院嘅場地，知道仲有五日，所以就有加場嘅諗法，亦好想知道戲迷嘅反應。」此時全場觀眾無不尖叫並連聲叫好又拍手，氣氛熾熱！親睹戲迷的超級熱情，令阿刨感動得流下淚來，身旁兩位新秀花旦鄭雅琪及李沛妍即上前安慰，更有演員遞上紙巾給阿刨拭淚。

面對現場的起哄及熱情，情緒稍為平復後，阿刨三度致謝說：「多謝！好多謝大家，係大家嘅支持先至有今次嘅演出，更加非常多謝一班台前幕後工作人員，多謝！」當布幕降下後，觀眾依依不捨留於原位大叫，阿刨最後第五度出場謝幕。

高呼「We love刨刨」

散場後，有戲迷為近距離一睹阿刨的風采，紛紛在後台門口駐足，當阿刨現身時，戲迷大叫：「We love刨刨！」逗得她不禁冧笑，並揮動螢光棒步向戲迷堆親自致謝。當阿刨登車離開後，戲迷衝出馬路追車，險象環生！

另外，兩位花旦鄭雅琪及李沛妍的演出好評如潮，二人異口同聲表示其實非常緊張。鄭雅琪接受本報訪問時坦言，由綵排至公演感覺如一場夢，她說：「總綵排當日真正踏台板，嗰刻真係由心震出嚟，直到公演以為自己唔震，點知舞扇時發現隻手係咁震，由心震出嚟，緊張程度超乎想像。公演後嗰晚我瞓唔着，能夠同大師級菩生姐（阿刨）合作，係一個好好嘅經驗。」她續說去年秋天起跟阿刨學習及排練：「佢教我演戲上好多竅門包括感情投入，菩生姐已經交咗條匙畀我，我會繼續摸索，好多謝佢嘅指導，係畢生難忘嘅經驗。」李沛妍則表示如上了一課深造班：「菩生姐喺度，就好似畀咗定心丸，我個心當堂定啲。佢教我點做動作同投入感情，真係獲益良多！」