熱血Band友movin'雖然未有簽經理人，但憑一己之力成功第二次開音樂會！碌盡友情卡的五子台上向各方老友致謝，但主音袁學謙卻未有兌現騷肌承諾！

主音袁學謙自言朱古力肌未成形，留待下次開騷晒肌。

隊長Steve做「夜鬼」先有得練歌，但認為是值得的。

movin 獻唱多首原創歌曲冧粉絲，High爆全場。

movin 為開騷碌盡友情卡，邀得平原集作（右三及四）做嘉賓。

創作樂隊movin'日前在九龍灣開騷，獻唱多首原創歌曲如《別到海底找我》與《流行》等贈歌迷，令撐場好友及粉絲大飽耳福！今次五子碌盡友情卡，邀請平原集作成員黃浩琳（Lillian）與顏培珊（Shandy）Jam歌，令全場High爆！

做「夜鬼」凌晨練歌

未有創作過情歌的movin'即場發布「處男作」情歌，唱出「小男人」的戀愛心聲，又感言全靠各方好友鼎力相助才成功開騷，故台上致謝時感言：「冇大家就冇今日嘅movin'！」

其實movin'五子各有正職，全靠對音樂的一份熱誠，唔怕做「夜鬼」凌晨夾Band練歌，籌備近半年終於成功第二次開騷！五子坦言今次演出籌備充足，晨早夾定時間表練歌：「早喺八個月之前，我哋已經夾好時間，定咗每個星期練兩、三日歌。其實吸收過上年開騷嘅經驗，朋友都話我哋唱得太多歌，所以今年定好主題，慢慢預備。雖然今次個騷未去到完美，但好多嘢都合格喇！」

不過，主音袁學謙上年首次開騷時曾揚言，下次開騷會剝衫晒肌益粉絲，但他竟然開空頭支票：「六舊肌未成形，大家都叫我練好八舊先見人，下年都未必得，後年啦！」