無綫台慶於今晚舉行，首任台慶司儀的梁烈唯擔心變Gay，故將名字改完又改，最終用回原名。而志偉則示意願為「Unfriend」的王晶與杜汶澤、黃秋生等充當「和事老」。

作為台慶司儀新人的梁烈唯及陳凱琳雖然十分緊張，但仍有信心完成工作。

（左起）：錢嘉樂、黎芷珊、曾志偉、汪明荃、陳百祥、陳凱琳
曾志偉與汪明荃率領一眾無綫藝員為台慶準備拜神儀式。

無綫年度盛事《萬千星輝賀台慶》將於今晚舉行，大會司儀汪明荃、曾志偉、陳百祥、錢嘉樂、梁烈唯及陳凱琳等昨日為節目拜神，兩位台慶司儀新人梁烈唯及陳凱琳均表示現場騷不同拍劇般可以NG，心情緊張又擔心前輩爆肚。提到梁烈唯的名字近期改完又改，他透露是擔心患抑鬱症的緣故：「改咗『維』字一個月，覺得自己情緒波動、好唔開心，都驚有抑鬱症，咁啱有個師傅同我講『維』呢個字啱女仔，仲會令我唔開心，仲話有機會變Gay，所以都係用番『唯』。」

阿姐唔知婷婷甩拖

對於香港電視開台硬撼台慶，志偉說：「香港經過咗呢五十幾日（指普選爭議），大家要團結，經濟差咗，希望大家多啲消費，Unfriend咗就Like番，香港人幫番香港人。最痛心係見到大家撕裂，依家大家想為香港爭取明天嘅嘢，不及今日失去嘅多，最重要引起咁多人不滿，我哋行業都引起對罵，以前係好朋友、帶過佢出身……（指王晶與杜汶澤、黃秋生罵戰）咁又何必呢？大家要尊重每個人嘅意見，豁達啲、包容啲。問我贏唔贏港視已經唔重要，最緊要行業興盛多啲人睇電視。（做和事老？）等件事平息咗希望大事化小。」

而汪明荃（阿姐）則接受由美國City of Monterey Park代表頒發「演藝界最高榮譽貢獻」獎項，表揚她對演藝界的貢獻。對於契女謝婷婷與男友戴尚安分手，她說：「唔知道喎！未聽佢講過，亦未見過佢男友，依家啲女仔唔使急嘅，後生仔女拍拖離合屬平常，最緊要揀到啱。」