陳敏之、楊洛婷、蘇志威與設計師何國鉦昨日到中環出席婚嫁活動，剛為人妻的敏之指婚後既要打理舖頭生意，又即將開劇，比婚前更忙，猶幸老公沒有投訴。在新劇《性在有情》中飾演性治療師的她笑說：「劇情都講得幾白，但係就唔露骨，因為用一個醫生角度講解性知識，我都同啲女性朋友講，拍完套劇可以同佢哋講解。（老公唔准拍咀戲？）唔會，但佢唔會睇，當然唔係咁鍾意。」又指未習慣被叫雷太。而楊洛婷稱與拍拖多年的樂隊Dear Jane主音黃天翱（Tim）有結婚計劃：「唯一決定咗唔喺香港結婚，佢話要畀驚喜，可能好即興，婚後會努力造人！（已求婚？）我30歲之後佢日日都叫我嫁畀佢。」

敏之笑言拍畢《性》劇後可以與朋友講「性」經。

敏之與沈震軒在MV中再續前緣。

另外，陳敏之的螢幕男友沈震軒（Sammy），日前邀她拍攝新歌《換個他》MV，兩人再演劇集《使徒行者》的Kobe和Yan，延續劇中的未了緣，Sammy說：「MV係講Kobe希望Yan可以搵更好嘅情人，但最想其實係Yan可以返嚟身邊。」MV中有兩人過往的甜蜜回憶，當中更有多個咀嘴鏡頭！