杜琪峯昨午現身大學會堂，接受香港浸會大學向他頒發的榮譽文學博士學位，大會即場宣讀他對香港影壇作出的貢獻，一眾圈中好友包括任賢齊、黃浩然、鍾漢良及張艾嘉等出席支持。杜琪峯受訪時說：「呢個榮譽唔係我一個人嘅功勞，當然要多謝幕後嘅同僚。（好多人嚟支持你喎。）真係盛情難卻。」

杜琪峯獲頒博士學位，認真威水。

早前他接受內地媒體訪問，對「新歡」高圓圓讚不絕口，卻似對「舊愛」張栢芝有微言。他昨日續說：「我唔係批評邊個，圓圓係抵讚嘅，佢好純品，佢媽咪需要長期照顧，而圓圓就放低一切，乜都唔理。」相反談到栢芝，他即說：「做人嘅嘢，做幾多、得幾多，做啲咩、得啲咩，食啲咩、生啲咩囉。好多嘢無謂講，大家知乜事。（唔同佢合作？）機會細啲囉，可能佢唔係咁適合，我嘅電影需要比較專注嘅演員。」記者就此事致電栢芝經理人Emily，但至截稿前未獲回覆。

另外，杜琪峯昨晚與友人現身跑馬地一間意大利餐廳，食飯慶祝榮升博士，下午缺席的黃秋生及汪明荃亦有現身，一眾好友悉心為他準備用「書」砌成的蛋糕，上面印有他曾執導的電影名字。