跳舞出身的劉敬雯自小矢志加入娛樂圈，中途曾經被人嫌老勸退，幸好迷失過後繼續追尋演藝夢，她終於可演戲、唱歌及跳舞三線發展，她最希望與偶像周星馳合作，向「星女郎」之路進發！

劉敬雯

劉敬雯對演戲甚有興趣，希望有機會與星爺合作！

有舞蹈底子的劉敬雯，擺甫士絕對冇難度！

劉敬雯（奶茶）去年與顏卓靈及蔡瀚億（BabyJohn）接拍了一套本土舞蹈電影後，開始為人認識，最近她獲時裝品牌睇中擔任代言人，有舞蹈底子的她擺甫士冇難度，問到可會介意轉行性感路線？她說：「我自己對於性感真係冇乜尺度！我一身健康膚色都係健康性感啦！遲啲有客要求性感都冇問題，最緊要正面，我有練定馬甲線。」

韌帶受傷手尾長

奶茶積極與舞團組隊比賽，但訓練期間不慎受傷：「整到韌帶受傷，手尾好長，雖然好番，但會有風濕，落雨日子狀態就會差啲。」除了跳舞外，她早前參演由彭秀慧執導的微電影，她透露對演戲甚有興趣：「每次新角色都要揣摩，咩角色都想試，希望第時有機會同星爺（周星馳）合作，細細個就睇佢啲戲大。」　

自小立志加入娛樂圈的奶茶原來曾受到不少打擊，經歷一段灰心的失意期，她說：「有段時間唔開心，想放棄，初初可能未搵到自己，好多人叫你『放棄理想，接受現實，你都咁大個，錯過咗機會啦』，搞到自己都好迷失。」幸好最後跳舞令她重拾信心，近期更將自己的故事化成音符，新歌《無謂講》充滿熱血感覺，鼓勵大家勇往直前，繼續追夢：「希望大家唔好解釋咁多，有咩都做咗先，試咗先，唔得咪算囉！」