As One賣舞遭冒警踩場
組合As One乘專用貨車到各區晒舞技，不慎洩春光，不過最陰功莫過於被「爆腎主腦」李健宏派出假警察攪亂檔，嚇得三女花容失色！
As One趷籮、自摸，跳得忘形！
As One與粉絲合照，十分識做！
勁歌熱舞的As One，露出黑色打底褲。
As One坐專用貨車突襲港九新界騷舞技，大批粉絲捧場！
黃柏高（Paco）力捧的女子組合As One日前乘搭專用的「As One戰車」，巡遊港九新界玩快閃，在車上大跳勁舞宣傳新歌《New Girl》。當到了旺角站時，吸引近半百粉絲圍觀，三人身穿短裙登場，舞步相當誘人，趷籮、自摸樣樣出齊，但跳到忘形時，三位成員輪流春光乍洩，露出黑色打底褲。
練舞扭傷
接受訪問時，成員Shin表示曾試過漏夜「微服出巡」，發現仍有不少粉絲圍觀她們的專屬戰車，可是她們大嘆在車上有難度：「因為架車係有少少斜落去，所以有啲動作做唔到，同埋一唔小心就會仆落去，之前練習時都試過扭傷。」
As One自爆在銅鑼灣站跳舞時，公司同事一早與整人節目《玩爆你個腎》主腦李健宏（Kevin仔）夾計，齊齊遭到大整蠱。成員Elfa憶述表演期間，貨車台側突然有位瘋狂粉絲大動作跳舞：「個粉絲仲想爬上台，我哋嚇到彈後，仲落埋閘。之後又有兩個警察話我哋阻街，叫我哋出示身份證，點知原來最後都係假嘅，Kevin仔一早安排好晒。」被整蠱一輪後的她們自言不擔心再遇瘋狂粉絲，成員Nata說：「我哋會陪佢一齊癲，最多叫公司請番兩個保鏢跟住我哋。」
