早前患上「貝賽特氏症」的黃浩然已經逐漸康復過來，大病一場後令「大鐵人」的他醒覺要保重身體，並將家庭放在第一位。而在台慶劇《名門暗戰》首演大反派的浩然則自言壓力大得令他失眠。

黃浩然加入無綫七年首次演反派，壓力大得令他失眠。

大病初愈的浩然身體漸漸康復，準備重投工作。

黃浩然（左）與黎耀祥在《名門暗戰》中有不少對手戲，正邪大鬥法。

黃浩然早前患上罕見的「貝賽特氏症」入院留醫兩星期，今次重病原來是他加入無綫七年來首次「冧廠」，大病初愈後令他更愛錫身體：「有廿幾年冇發過燒，喺無綫呢七年靠意志堅持，話畀自己聽唔可以冧廠，可能咁多年積積埋埋發出嚟，今次係一個警號，以後唔會死頂，今次令老婆好擔心，第日會將家庭放番喺第一位，唔會淨係諗住工作。」

盼出街畀觀眾鬧

浩然在無綫台慶劇《名門暗戰》首次演大反派，奸到出汁，拍攝時也被奸角搞到失眠：「角色由好變壞，好多灰色地帶，拍嗰陣都好大壓力，搞到失眠，角色後期變晒質好多歪理，唔覺得自己錯，得唔到都要摧毀佢。」

事實上反派往往更搶戲，問做慣好人的他可會愛上做反派？他說：「最好不停咁轉吓，之前有一排連續幾套喜劇，後尾都覺得自己冇貨，唔抗拒做壞人，的確壞人發揮空間大啲，今次試吓水溫，我都想出街畀觀眾鬧，咁即係代表中喇！」

浩然在劇中與黎耀祥對手戲甚多，由好拍檔變死對頭，感情線則先後與胡定欣及陳凱琳有發展：「呢套係同祥仔合作以嚟最多對手戲嘅一套，大家好有火花。」