將於明年來港開騷的英國女歌手Lily Allen受訪時表示，揀男人就如揀樓一樣，遇到真愛就自然知道幸福來訪，Lily更指人生只有放棄和向前兩種選擇。

記：記者 LA：Lily Allen

記：Lily，你經常都會有新搞作！今次重返樂壇感覺如何？

LA：我好開心可以回歸工作！我過去幾年真係好享受，可以花好多時間陪女兒，但係返嚟娛樂圈工作都好開心！

記：點解你之前會闊別樂壇，你厭倦咗娛樂事業？

LA：我只係想休息一段時間，了解自己做緊咩。當你工作嘅時候，有好多人會話你知你需要做啲咩，無論係唱片製作、宣傳同埋其他工作。我成日都想有細路，當我識到我老公之後，我知道佢係我想同佢生細路嘅人，所以我放低所有嘢，製造一個舒適嘅環境。

記：但係你點知真命天子就喺你面前？

LA：我自然會知道，就好似你買樓咁，當你遇到一間適合嘅屋，你就會愛上佢。當我遇到Sam嘅時候，我冇花好多時間估佢係咪真命天子，之後佢就叫我嫁畀佢！

記：你哋兩個一齊咗幾年，仲有兩個女，又要兼顧忙碌嘅工作，你點樣保持兩人嘅激情？

LA：我覺得我同佢只係啱啱開始，四年唔係啲咩嘢，到50歲嘅時候我先會開始擔心！我諗兩個人一齊秘訣係一直感受愛。我老公每兩星期就會帶我出街撐枱腳，又會帶我去啲未去過嘅地方搞新意。

記：喺新碟《Sheezus》入面有好多講你嘅歌曲，最傷心嘅歌曲《Take My Place》更係講你流產嘅事，你點樣克服呢啲傷痛？

LA：克服傷痛唔係一個選擇，你永遠都唔想有啲咁嘅事發生喺你身上。生命只有兩個選擇，一係讓唔開心嘅事一直帶你去谷底，一係嘗試令自己好過啲，重拾新生活。