前港姐陳庭欣（Toby）與前港男許家傑老友鬼鬼，不時相約學泰拳，Toby大讚家傑跳拉丁舞時魅力非凡，豈料家傑卻大爆Toby是「似男人嘅女人」！被踩到上心口的Toby大叫：「乜你咁衰o架！」　

家傑大爆Toby練泰拳時「卸膊」，好多動作都不肯做。

家傑笑Toby是「似男人嘅女人」，即被「還拖」！

踢中家傑腳踭後，Toby的小腿即時腫起，陰功豬囉！

Toby認為打泰拳要運動全身，瘦手臂之餘亦可達致瘦身效果。

與家傑相識多年的Toby，入行後跟對方學拉丁舞而結緣。

打泰拳近年非常盛行，男的用作健身，女的則用作減肥，老友鬼鬼的Toby與許家傑擁有共同興趣，Toby已學泰拳一年，一直喜歡發掘新興趣的她學過策騎、跳舞及唱歌，不過她鍾情的竟然是泰拳：「學咗都成年啦，覺得好好玩，我一向都鍾意做運動，當初係陳志健教我健身，見到佢個身形咁Fit，知佢有打泰拳就試吓去學，我個人節奏感好差，學泰拳都有幫助！」她深知學泰拳有瘦身之效，因為打泰拳時會用到身體各部位，例如轉身要拗腰、踢腿又不止用腳力，全身都需要配合，因此能有效全身減磅，而不是只是瘦手臂。

Toby最叻「卸膊」

許家傑則表示學泰拳三個月便完全愛上：「初初日日都嚟打，首先做2個鐘帶氧運動，又要跳繩練速度，日日打拳踢腿，真係好似張家輝咁o架！」由於頭幾次練得太誇張，令身體累到無法入睡，後來才學懂放鬆節奏令身體適應，但就發覺狂操後激瘦了十磅，其後便到健身房練肌肉。至於有否跟「師姐」Toby請教打泰拳的心得？他大爆Toby最叻「卸膊」：「教練叫我做咩我就做咩，掌上壓、跳繩、跑步咩都齊！教練叫Toby做，有時佢就會話：『我唔得啦，我隻腳好痛，好攰！』」

問到相識經過，Toby表示入行便認識對方：「我2010年選港姐，佢就係2009年嘅香港先生，所以當時有好多宣傳活動都會一齊做！」不過真正令他倆變得熟落的契機，卻是Toby跟家傑學拉丁舞！再加上他倆都喜歡學習不同的運動及興趣，因而一拍即合，家傑認為Toby是一位「似男人嘅女人」，個性爽快率直，喜歡的運動與其他女仔不同，就連他與周志文及周志康打籃球，Toby也會前來觀看。

至於Toby則大讚家傑很有魅力：「當初跟佢學拉丁舞嗰時，覺得佢好有魅力o架！嘩！佢條腰扭到呢！」她又指家傑非常細心，有時拍劇收夜會主動做「護花使者」，探問是否需要護送回家，但當Toby聽到家傑覺得她「唔似女人」時，即時激動大叫：「乜你咁衰o架！我講得你好好o架！」

熟到點唔起愛火

他倆有不少共同興趣，問到有否想過對方成為另一半？家傑笑說：「人哋名花有主啦！（指陳庭欣的緋聞男友翟威廉）」而且他倆已成為「兄弟」，故未有想過追求。而Toby則表示與對方太熟故未能成為情侶。談到工作，家傑透露最近埋首拍攝新劇《水髮胭脂》，於劇中與朱璇有不少親熱戲：「有一場我喺廁所沖完涼出嚟，上身赤裸，佢行埋嚟坐我大髀，仲有咀戲添！」緊張的家傑為此盡力操Fit身形，而忙於拍攝《愛‧回家》的Toby則飾演泌尿科醫生。

擂台武情講

講多無謂，Toby與家傑「上擂台比武」最實際，雖然搞笑成分居多，但Toby卻不慎受傷！他倆踢腿激鬥時，Toby的小腿踢中家傑的腳踭，因而腫了一大片。慘情的Toby認真我見猶憐！