歌手張敬軒的演唱會前晚舉行尾場，當中最矚目的環節是軒仔即席邀請捧場的容祖兒做嘉賓。兩人在台上公然咀嘴，祖兒自爆上過軒仔家留宿但「冇過火」，之後軒仔取笑對方粗身大勢！

軒仔邀祖兒上台做嘉賓並即興咀嘴！

軒仔與祖兒拖手合唱，但不忘取笑女方「粗身大勢」。

軒仔走近時，洪卓立即勁High！

軒仔與吳雨和霍汶希等慶功。

張敬軒一連三晚《LIVE IN PASSION HINS張敬軒演唱會》在紅館舉行，前晚是最後一場，不少藝人捧場，包括容祖兒、洪卓立、湯怡、單立文、胡蓓蔚、胡杏兒和胡定欣等。當晚演唱會依然有契媽關淑怡、好友王菀之和譚玉瑛姐姐做嘉賓，軒仔逐一向他們致謝後，提到要感謝另一位好友：「我搞呢個演唱會嘅時候抑鬱症有啲翻發，有一位朋友不斷約我出去玩，喺我有困難時都會喺我身邊，呢個人真係好Sweet！今日一場嚟到，梗係要叫佢上嚟唱歌啦！」此人正是天后祖兒。

「賓賓」廚藝了得

軒仔即場邀請合唱，祖兒亦爽快答應，上台後即拉着軒仔自拍，更笑指對方是「深水埗Beyonce」。他們提到第一次見面是在電台的餐廳，祖兒大讚軒仔熱情：「佢完全融化咗我！」又自爆曾到軒仔家過夜：「你係第一個我去佢屋企瞓但冇過火嘅男性朋友！」祖兒繼續爆料，指軒仔的「賓賓」廚藝了得，又會彈結他，此時軒仔立即阻止她說下去。

兩人拖手合唱《天窗》後，更嘴對嘴錫錫，之後軒仔盡男士風度送祖兒落台，但愛開玩笑的他突然說：「小心啲！粗身大勢吖你！」事後祖兒在社交網絡上載與軒仔在台上的自拍照，更稱軒仔是百厭仔，在她不知情下偷偷練唱《天窗》。

完騷後，問到軒仔是否暗示祖兒有喜？他否認並自認口沒遮攔：「我想佢粗身大勢啫！希望佢快啲成家立室，唔係老咗生唔郁，不過我睇佢個樣似旺丁！」至於祖兒在台上說的「賓賓」是否「密友」關智斌時，軒仔笑說：「個斌字咁深，我唔識喎！」

Steven帶女友闖後台

此外，張致恒（Steven）大前晚帶同模特兒女友莊端兒睇軒仔個唱，之後更拖女友闖後台與軒仔合照。昨日Steven被問到和女友首度公開拍拖時說：「依家好Free，唔使再偷偷摸摸，朋友都好鍾意女友。」並讚軒仔個唱超好睇，是繼陳奕迅後，另一個令他睇到想喊及打冷震的歌手。