張繼聰昨日錄影無綫節目《超級巨聲4》，在《老表，你好hea！》中狂騷肌的他自爆囝囝最愛「震波猜枚」一幕，更指後期會着番衫，呼籲觀眾「想睇快啲睇」！現時爆肌不再的他指太太謝安琪未有埋怨：「跟同年紀嘅人，比上不足，比下有餘！」　

在《老表》頻頻騷肌的張繼聰預告「着番衫」，觀眾要把握機會喇！

一眾參賽者與主持及評判合照。

李璧琦以青春打扮現身錄影。

陳潔靈對參賽者一視同仁，畀分絕對唔講感情。

張繼聰、陳潔靈、李璧琦及森美等昨日為無綫節目《超級巨聲4》進行錄影，作為主持人之一的張繼聰坦言很好玩。對於參演劇集《老表，你好hea！》上周收視平均26點、最高29點，雖然成績未如上輯理想，但他有信心收視會繼續升：「都唔算麻麻，依家電視好多選擇，又唔多人喺屋企睇電視，不過口碑都幾好！討論區好多人傳訊息嚟話好開心，食飯時好耐冇噴飯同骾親，好耐冇咁瘋狂嘅劇，係需要Warm Up我絕對唔擔心！」

Keep住運動

幾乎集集晒肌的張繼聰遭朋友嘲笑裸露鏡頭，該劇列明需家長指引，他笑說：「到中後期有多啲衫着，所以想睇嘅快啲睇啦！我個仔好鍾意睇猜枚嗰Part。」大呻操肌辛苦的他承認現時不是最佳狀態，問到有否被太太謝安琪埋怨？他笑說：「雖然冇之前咁Fit，但跟同年紀嘅人比，比上不足，比下有餘！依家有Keep住做運動，後來拍《四個女仔三個Bar》，監製都叫我唔好咁大隻。」

評判冇情講

擔任節目評判的陳潔靈表示有份揀蟀，記者指不少參賽者走音，她解釋參賽者未有足夠時間訓練，加上首集有點緊張，並指今屆水準平均，有一、兩個女仔較出色。提到顧紀筠兒子陳浚霆有份入圍，她笑言初時不認得對方：「識佢時未轉聲較高音，依家隔咁耐應該中性少少，要一陣聽埋先知唱成點！（有感情分？）冇！我哋聽嘢好中立，畀感情分係因為本身有天分，好似林欣彤、馮允謙咁，某次好差就會綜合以前表現，我哋會考慮邊個值得留低，因為觀眾、網民都有判斷能力。」並指對表現優異的參賽者會較嚴謹，希望他們有進步空間：「好似鄭俊弘都要挫吓佢銳氣，唔係佢以為自己好就冇進步！《超》係想孕育一班人喺音樂發展。」