組合HunterZ成員陶枳樽與張栢芝有幾分相似，雖然人有相似，但Crz並無栢芝那麼敢愛敢恨，自言會為愛情盲目的她，對感情會失去理智。此刻，她除專心發展其歌唱事業外，更會踏上美容博客之路，實行跳得唱得又睇得！

陶枳樽（Crz）

Crz被指有點貌似張栢芝，未做聲帶切繭手術前，其鵝公喉更似到十足。

本是全職舞蹈員的Crz（後排中）因跳舞理念一致，與蕊蕊等人組成HunterZ闖樂壇。

Crz曾以春麗造型參加Playstation Girl選舉。

自封貪靚怪魔的Crz決心向美容博客之路發展。

為愛情失去理智的Crz，因男友偷食而過住行屍走肉的生活。

現今樂壇女子組合何其多，以型格性感見稱的組合HunterZ由蕊蕊親自領軍，與陶枳樽（Crz）、何麗娟（Kelly）及鄧詠雪（Suetzi）殺入樂壇。本是全職舞蹈員的Crz在朋友介紹下認識蕊蕊，及後覺得大家理念一致，故決定加入HunterZ，她說：「我朋友話蕊蕊想組隊組合，所以就介紹畀我，大家傾偈都覺得好夾，都係跳舞為主，所以自己都好想試吓。」問到入行後可有不慣的地方？Crz說：「其實都有少少唔慣，依家都學習當中，出街會有人認得，仲有粉絲同我影相。最重要係以前落街可以唔顧形象，素顏拖鞋上陣，但依家就唔Hea得，驚會有人影到。」

經常被隊員標籤為「女神」的Crz，望落與張栢芝確有幾分相似，連帶鵝公喉的獨特聲音都有幾成似，問到Crz有否覺得？她笑說：「自己就唔係好覺得，不過身邊朋友都有咁講過，我都好鍾意佢，不過就高攀唔起佢啦當然。我原先把聲同佢都好似，但之前我做咗聲帶切繭手術，就變得唔似，好多朋友都話好失望，好搞笑！」

栢芝對感情向來敢愛敢恨，不過Crz坦言沒有如此勇氣，面對愛情會變得失去理智：「試過有一次前度男朋友搵咗第二個，但我都仲好鍾意佢，同佢講叫佢玩夠就返嚟搵我，冇咗佢嘅日子好似行屍走肉咁，連朋友都睇唔過眼。」

貪靚怪魔做美容博客

現今做藝人要百足咁多爪，所以Crz亦決心向美容博客之路發展，希望可以開拓新血路：「其實啱啱開咗個美容Blog，自己都籌備咗一段時間，本身都有寫開，但有咗Facebook都懶咗，之後覺得唔夠詳盡，所以都想認認真真開番個。」

她又坦言是貪靚怪魔，並已達到病態級別：「屋企有個櫃擺滿晒美容同化妝產品，依家都開始唔夠位擺，都唔知點算。（拍片定寫字？）兩樣都會，不過暫時就想以文字為主先。」

後記：衝入波波池重拾童真

甫到拍攝現場，Crz即想衝進波波池，重拾兒時的回憶。最抵死的是，她更搞笑地將所有波波埋在自己身上，之後人再彈出，令在場工作人員嚇一跳！

Profile：

姓名：陶枳樽（Crz）

出生日期：1989年9月19日

三圍：32B、24、34