阿佘畀位復合嚇退Niki
不是冤家不聚頭！近日有傳與鄭嘉穎復合的佘詩曼，前晚她與嘉穎的兩任舊愛周麗淇（Niki）及徐靖雯同場現身，巧妙地狹路不相逢。一臉風騷的阿佘直言單身已久，等候嘉穎的「Timing」降臨！相反傳因阿佘介入而分手的Niki出招避佘，但死撐同場相遇冇尷尬。
阿佘講到明Timing成熟喺埋一齊就開心，嘉穎仲唔識做！
Niki最後避無可避，被追問佘穎傳復合一事，隨即封嘴話：放過我啦！
嘉穎三大舊愛巧合同場，異口同聲表示不知對方會出席。
Niki再度蒲頭之際，阿佘又喺身後出現，Niki即時變得笑容牽強，更隨即有人欲拉走她！
徐靖雯影相時，咁啱Niki姊姊周汶錡（左二）行過撞到正，又會咁啱咁蹺嘅？
徐靖雯
自2009年分手後，無綫小生鄭嘉穎與佘詩曼不時傳翻撻，兩人日前現身曹永廉的生日會時終有眉目！兩杯落肚的嘉穎孖住阿佘滿場飛兼不停密斟，明顯一觸即發，隨時愛火重燃。事後，嘉穎未有否認翻撻一事，並指感情事要講Timing。
嘉穎的「Timing論」言猶在耳，他的三位舊愛阿佘、周麗淇（Niki）與徐靖雯（Jenny）前晚卻同場現身品牌活動！首先現身的阿佘被問跟Niki及Jenny同場會否尷尬？她笑說：「今日出嚟工作，大家都好開心。（介唔介意同Niki合照？）大家安排。」對於日前有傳她與嘉穎翻撻一事，問到阿佘會否給對方「Timing」？她則暗有所指說：「我一直都係單身！（係咪唔介意食回頭草？）愛情好微妙，如果兩個人開心，時機成熟喺埋一齊係開心事，唔應該用唔好嘅形容詞去形容。（你鍾意畀機會人？）如果有好嘅人出現，會同大家分享！」
賴衫扣爆開先「消失」
正當阿佘風騷講復合之際，Niki撞到正現身會場，期間其助手向她耳語一番後，Niki即連相也未影完便突然離開會場，並站在場外。不久阿佘離開，從Niki背面擦身而過，有所警惕的Niki即被觸動神經，笑容頓時變得僵硬，直到對方離開後才再度受訪，明顯有心避阿佘，但受訪時卻死撐沒有刻意避對方：「我唔知今日有邊個嘉賓，亦唔知阿佘喺現場，唔知大家點解咁鼓譟！剛才影影吓相助手話我知件衫個扣針爆開咗怕走光，所以入番去整，希望大家高抬貴手。（你避開阿佘？）我冇避開！唔會咁唔大方，同場冇所謂，構成大家嘅幻想唔好意思，我唔想影到啲走光相啫！大大方方冇乜嘢，合照我冇所謂，唔尷尬！」
當問到對「佘穎」翻撻一事，Niki即說：「唔好問我呢啲，放過我！唔關我事，我冇乜嘢可以講。（祝福佢哋？）我唔知！怕答錯好危險，人哋嘅嘢我唔知。任何人一齊都係開心事，但個別事件唔知係真定假，總之人哋開心咪得囉！希望大家高抬貴手。」並再次澄清與阿佘冇心結，卻不願主動邀對方合照：「唔好！依家咁刻意，頭先就冇所謂。」
徐靖雯寸冇新鮮感
至於Jenny則一臉無奈，對於與Niki及阿佘同場表示不尷尬：「都係好耐之前嘅事，成三、四年前。唔覺係大會刻意，我最近忙工作，將接拍賀歲片。（傳佘穎復合？）係舊聞！冇新鮮感，生活變化得好快。（祝福佢哋？）邊個同邊個一齊都會祝福。」
