香港新進導演孔令政（James）新片《第七謊言》，找來新一代演員林德信（Alex）及蔡穎恩（Evelyn）扮演情侶，戲中擁有超能力的Alex很高興可以留鬚演出，而飾演逃婚新娘的Evelyn被問及與留鬚的Alex拍接吻戲的滋味時頻呼尷尬，James指兩人的化學作用非常適合電影風格。　

林德信非常滿意留鬚拍戲，懶理Evelyn投訴咀嘴拮面！

林德信

Evelyn咀完滿面鬚根的林德信後，又要在鬧市跑到甩頭甩髻，認真陰功豬！

導演James（右）睇中Evelyn及林德信之間的火花，促成今次合作。

Alex不但為戲中的超能力角色做足功課，更細至唇上的每一條鬚亦有關注，他說：「我個角色有超能力，我參考咗啲外國劇研究演法，最開心James畀我留鬚演出！因為之前我拍過好多嘢都叫我剃鬚，但我覺得鬚係種能力，我仲修靚啲鬚先開工，但Evelyn同導演投訴，話好痛，停機即刻補妝，可能我啲鬚整花咗佢個妝！」

高踭鞋跑斷腳

「投訴人」Evelyn即時解釋：「我雖然拍過好幾次錫錫戲，但啲對手全部都冇鬚！（Alex啲鬚好拮？）好尷尬，我都未試過同有鬚嘅男仔錫！」

扮演逃婚新娘的她笑說：「導演叫我新娘Look喺銅鑼灣鬧市跑咗六、七轉，本來唔見腳嘅鏡頭，係可以着波鞋當高踭鞋嘅，但導演好鍾意拍全身，又次次都話Last，我對腳好痛囉！」

新導演愛惡搞

James見狀即反擊：「我鍾意惡搞佢兩個嘛！正如我開拍前要捉佢兩個排戲，相信佢哋拍戲以來都未試過！Alex好啱個角色，如果佢唔演，可能拍唔成。我初初同Evelyn講，要佢做個通街跑嘅新娘，佢話：『我乜都得！』係一種對自己嘅信念，信念有時都好似一種向自己講嘅謊言，正如我相信自己可以成為導演，有咗信念人就會大膽去嘗試，肯試至有機會成功！」