台灣藝人辰亦儒近日推出迷你專輯，封面相大晒強勁胸肌，變身大隻猛男的他竟然被同為「肌」男的台灣型男郭品超公然挑機，辰亦儒笑言：「我小猛男你大猛男」！

前台灣組合飛輪海成員辰亦儒近日趁炎炎夏日還未完結推出迷你專輯寫真書，更操到變爆肌男拍攝專輯封面，除咗令一班粉絲睇到嘩嘩聲，連型男好友郭品超都大力支持。

扮大力水手

不過，郭品超完全唔畀面地笑辰亦儒唔夠他般大隻，而辰亦儒亦在微博上載兩人合照向郭品超認低威：「這位帥哥真不給面子，我小猛男你大猛男，我小力水手你才是大力水手，哈哈，謝謝品超的支持，再一起健身哦！」相中的郭品超扮大力水手展示粗壯的右手手臂，不過睇真啲辰亦儒左手手臂其實同郭品超差不多粗，有不少網民留言大讚辰亦儒個Body靚，辰亦儒你唔使咁謙啦！你操肌操得幾努力，大家有眼睇嘅！