從「無名氏」到一夜成名，鄭俊弘昨日首次舉行簽唱會！被歌迷稱為「熊貓BB」的他與粉絲「紅」爆apm！左撇子的他在幾日前傷手：「好彩仲彈到結他畀大家聽！」

日前放狗時誤撼樓梯角的鄭俊弘，右手有機會留疤。

鄭俊弘與媽媽齊以紅色打扮示人。

「熊貓BB」鄭俊弘大擺愛心甫士冧粉絲。

鄭俊弘（Fred）昨日在apm為新碟《熊貓的故事》舉行《apm x 鄭俊弘熊貓的故事簽唱會》，成名前的Fred在「星夢」時期只得6個粉絲，昨日他獲來自澳門及新加坡等地的逾百粉絲捧場，加上「忠實粉絲」媽媽、姨姨及唱片公司CEO何哲圖到場支持，感觸良多的他說：「新碟出嘅時候好多歌迷拎碟畀我簽，我都忍住，就係為咗等今日！」其後Fred唱出《無名氏》及《熊貓》等新歌，並與粉絲大玩遊戲，炒熱現場氣氛！粉絲有心思地製作一個六格相框，並貼滿Fred由參加星夢至今的各件「大事」。

「情侶裝」晒默契

談到與粉絲的服飾「紅」爆整個apm，Fred笑言大家心有靈犀：「我哋冇夾過，但佢哋好好，着晒Fans Club件Tee，媽媽都咁啱着咗紅色！」提及右手上的傷口，他說：「早幾日放狗，行緊樓梯時狗狗突然掟彎，我一時拉唔住就撞咗埋角！」問及會影響彈結他？Fred大派定心丸表示傷後即時試彈，完全沒影響。至於簽唱會方面，他說：「好彩我用左手寫字，不過就可能會留疤！」

包辦婆婆食宿

將於下月初開騷的Fred透露除媽媽捧場外，居於溫哥華的婆婆、親戚及十多名舊同學亦會返港支持：「好開心呀！由細到大佢哋都知我鍾意唱歌，近年都有好多中學同學返咗香港發展，加加埋埋應該都有廿個人！」問到Fred會否包辦食宿，照顧遠道而來的親友？他笑說：「我未有呢個能力，但婆婆會包晒！」