影后劉嘉玲早前自稱到北京探王菲，雖然最終因錄影無暇見面，但昨日她揶揄好姊妹沉醉於戀愛中，並大爆之前在飛機上巧遇謝霆鋒，踢爆他春風滿面。

嘉玲（左）撐紅姑場，並送花打氣。

霆鋒返京後被拍得到王菲寓所。

影后劉嘉玲、毛俊輝昨日接受汪明荃（阿姐）及崔建邦主持的無綫節目《女皇的盛宴》訪問，談到好友王菲與謝霆鋒世紀復合，早前透露到北京見阿菲的她稱為內地節目錄影了11小時，無暇約見阿菲，又取笑蜜運中的阿菲Sweet爆：「佢太沉醉，但都有覆我短訊。（問佢拍拖嘅嘢？）我唔想知咁多，最緊要佢開心，第時再搵佢傾偈。」並自爆上次到北京時，巧合與霆鋒坐同一班機：「我笑佢返港冇耐又飛，佢話係呀！我覺得佢好開心。」早前有傳阿菲再度懷孕，嘉玲說：「唔會，冇可能，除非佢又呃我，但呢個世界Never say never，最緊要朋友開心。」

此外，遺憾未與阿姐正式合作的嘉玲坦言願為對方返無綫拍劇：「要我做咩都冇所謂。（驚畀佢鬧？）冇問題，打我都仲得，佢冇鬧過我。」

拉隊撐紅姑

錄影結束後，嘉玲又主動邀傳媒撐好友鍾楚紅（紅姑）的《To Hong Kong with Love》攝影展，甫到場即攬錫對方及送鮮花，並選購四幅作品做慈善，她又建議紅姑執導先拍微電影，更表示不介意做女主角，不過紅姑謙稱：「我怕醜，唔係好叻同人溝通。」

此外，霆鋒於本月初在甘肅錄畢節目後，再次被拍得返京直駛王菲寓所，兩人數天足不出戶，愛得癡纏。而霆鋒早前受訪時，坦言離婚後已找到「治療型伴侶」，並指許多事情都回不去，尤其是情感，未知是否暗示與前妻張栢芝的舊情。