產後復出的呂慧儀昨日出席公開活動，雖然收身情況理想，但上圍仍然谷奶，她笑指擔心過分性感會「跌出嚟」，加上囝囝相當大食，兩個月已重13磅，故正努力工作賺奶粉錢！

露出玉背的呂慧儀產後復出，身材依然索爆。

呂慧儀（左）表示谷奶，上圍與蔡恩真不相伯仲。

露長腿的蔡恩真表示做中介人，邀請韓星來港出席活動。

呂慧儀早前誕下小Anton便深居簡出，一心一意照顧囝囝，昨日終於出關搵真銀，聯同韓籍模特兒蔡恩真（EJ）為超市韓國美食節任嘉賓，產後首度復出的她，穿上黑色喱士連身短裙，收身進度不錯，惟上圍仍然谷奶，對此慧儀笑說：「打底不知幾辛苦，但我唔可以太性感，驚跌出嚟！」

冷落老公遭投訴

談到與昔日身形相比，慧儀表示磅數沒差太多，只肥了10磅，幸好有纖體公司贊助，令她慳番唔少：「依家餵人奶，都唔可以食少嘢，阿B唔可以冇飯食，佢兩個月大已經13磅，我家姐個仔以前5個月都係食5安奶，但我個B食8安奶，我冇特定一日餵幾多次，總之佢一肚餓就餵，好在已經成功戒咗夜奶，不過成日抱住佢，都搞到有少少媽媽手，要按摩吓！」

慧儀更透露囝囝已改中文名為黃柏翹，問到有何原因，她笑說：「純粹好聽，雙方父母一齊諗。（會唔會生多個？）生完冇耐想休息吓先，做媽咪好辛苦，不過活動我都會出席，要搵奶粉錢嘛！劇集如果啱角色都會接。」由於經常抱緊Anton不放，慧儀表示被老公投訴冷落了他。

EJ靠韓星搵食

而EJ則透露在韓國休息了半年剛回港，並與太陽娛樂簽了兩年合約，主力發展模特兒事業，另外亦有當中介人邀請韓星來港出席活動，如近期李敏鎬、安宰賢、李光洙及宋智孝也是經她安排，問到收入是否很和味，EJ笑說：「都唔錯！但我仍然鍾意Model工作，唱歌就唔好啦！」