正所謂「物輕情義重」，歌手朱紫嬈認為購物講求款式，而送禮則考心思，為向母愛爆棚的同事表達心意，她親手製作皮革卡片套，更揚言希望下次挑戰高難度的飛鏢袋！

一向有玩飛鏢的朱紫嬈，希望DIY飛鏢袋送給朋友。

朱紫嬈首次製作皮革卡片套，挑戰成功！

愛心卡片套
揼孔
製作皮革的第一個步驟是先為皮揼孔，Khloe選擇親手以工具揼孔，因為機器打孔在縫針後會露出一個個大窿。

穿針
先量度線的長度，然後在線的兩邊穿針，製作皮革用的針一般較粗，故初學者不用擔心會被針傷手。剪線時謹記要準確地計好長度，若縫至半路駁線的話，會令製成品沒有一氣呵成般縫得好看。

縫針
縫針要從右至左，切記留意孔的排序，梅花間竹地上一針下一針，若然一次過縫好一邊、再縫另一邊的話，肯定有一邊比較緊。

埋線
埋線時要先回一針，令兩條線均在皮的背面，剪線時每邊要保留0.5cm長度，剪好線後則以火機燒熔線位，燒到盡頭時，要趁熱將線尾壓實。

磨邊
在埋線程序後，要為卡片套磨平各邊，再將四個圓角磨平，磨邊的最大作用是讓皮革更加耐用。

揼字
完成卡片套後便可開始後期製作，經過多番嘗試後，Khloe便在卡片套上揼上朋友的英文名縮寫。

朱紫嬈（Khloe）出生於較富裕的家庭，不過與價格高昂的名牌商品相比，她更欣賞花心思製作的DIY小手作，Khloe從讀書時代開始便跟同學DIY禮物：「DIY嘅禮物感覺更加特別，我以前都會織頸巾，入咗行之後時間少咗，所以依家最鍾意整蛋糕！」Khloe今次為親切的同事製作一個皮革卡片套，有整散銀包經驗的她，這次卻是第一次：「今次個卡片套係整畀一個新同事，因為佢感覺好似媽咪咁好貼心，知道佢啱啱印好咗卡片，所以就決定整一個既實用又美觀嘅卡片套畀佢！」

埋線考功夫

製作卡片套時，Khloe舉手投足均有板有眼，問到揼孔、穿針、縫針、埋線及揼字哪個步驟最難？她說：「穿線都OK，我最怕反而係埋線，因為埋嗰下要用火機，我好怕會燒爛，用咗成擔心機整，燒爛咗就好可惜！」她又親手在卡片套上揼上同事英文名的縮寫：「我本身想揼全名，但唔可以揼太多，我始終係新手，怕會揼得唔整齊，所以只係揼咗兩隻字。」DIY上癮的她希望下次能挑戰飛鏢袋：「我一向都有玩開飛鏢，之前有諗過整啲飛鏢袋畀朋友，但因為每支飛鏢都係獨一無二，要為佢哋度身訂造對我嚟講都有啲難度！」

自製講心意

談到DIY和名牌的分別，她說：「我反而覺得款式比起牌子更加重要，主要睇襯唔襯，如果真係靚嘅話牌子同價格根本唔係問題！」至於DIY小禮物，她認為自製才有意義：「自己做嘅禮物更加有意義，但如果係買一件人哋DIY嘅，我就唔主張，DIY呢樣嘢好講心意。」