「食」何止是祭五臟廟或滿足口腹之欲，由「粒粒皆辛苦」的小道理到「衣食足而後知榮辱」的古人哲理，也是從食中得到感悟，但對汪詩詩表妹湛琪清來說，食是人與人之間的一道溝通橋樑，而她亦是網絡築橋人——Food Blogger。

不停品嘗美食及寫Blog的Jessica，仍能保持苗條身形，令人羨慕又妒忌！

Jessica的部落格每日有幾千人瀏覽，人氣如此強勁，全靠她對寫食評的堅持。

Jessica認為食物是人與人之間溝通的橋樑。

Jessica（左起）、汪圓圓及圓圓父母經常飯敍。

Jessica經常上網睇烹飪節目學整意粉。

面對大盤生蠔，Jessica當然要大快朵頤。

除了西餐，中式點心亦是Jessica的至愛。

個漢堡包啲肉咁Juicy，好想咬一啖呀！

表姐夫甄子丹及表姐汪詩詩（右）是Jessica寫Food Blog的啟蒙老師。

湛琪清（Jessica）除了是模特兒外，亦是一名人氣Food Blogger，她在兩年前開始撰寫飲食部落格（Food Blog），現時在行內已薄有名氣，在熱門Food Blog之中排第二。向來愛吃的她亦喜歡捐窿捐罅尋找隱世食店，但她一直沒有撰寫Food Blog的念頭，直至表姐夫甄子丹建議：「表姐夫經常會問我同詩詩表姐去邊度食飯好？每次我介紹佢哋去某間餐廳，佢哋嘅評價都好好，表姐夫話我好犀利，嚟咗香港一年幾，我識嘅餐廳仲多過佢，佢話不如你開個Food Blog，介紹唔同嘅餐廳畀大家。」

人情與味道

Jessica笑言她的部落格最初只有家人瀏覽，至今每日有幾千人瀏覽，甚至走在街頭亦被認出，還問她「你係咪Food Blogger Jessica」：「有次出席一個好隆重嘅舞會，大老闆嘅女走埋嚟問我係咪Jessica，又問我係咪有個Food Blog，又話成日有睇，當時我真係好有滿足感。有時會收到網友嘅電郵話多謝我嘅推介，我覺得幫到人好開心，亦係我繼續寫嘅推動力。」

對Jessica來說，食是重要一環，食並非單純地維持生命或品嘗美食，而是通過食來維繫人與人之間的關係及傳遞愛：「我成家人都覺得食係好重要，每晚都要一家人齊齊整整咁食飯，我嘅外婆、媽媽同姨媽（汪詩詩的媽媽）都係烹飪高手。以前喺外國讀書，外婆會每日幫我做愛心便當畀我帶返學校食，見到其他小朋友日日買快餐食，例如Pizza、漢堡包之類，我每次食飯都會感受到婆婆嘅愛，覺得好窩心！」在Food Blog中，除了有不同餐廳的食評外，Jessica還會加入自己的近況及與親友的合照，以及一些鼓勵的說話及分享，令部落格變得更有人情味。她還計劃在Food Blog中加入短片教烹飪，她說：「我經常會上網睇烹飪節目，沙律、意粉類、炒蛋同西湯我都識煮，而且我婆婆係上海人，所以都從佢身上學到少少煮上海菜嘅技巧。」

勇氣及堅持

每逢有新餐廳開張，Jessica也會急不及待試菜，她從不挑食，任何菜式也不拘，她說：「我有次去台灣食壽司，其中一款係有幾條魚仔嘅壽司，嗰幾條魚唔係死，而係生勾勾仲郁緊，但我諗都冇諗就放入口，因為我覺得壽司師傅畀得我食就一定冇問題，不過我同枱嘅其他朋友都唔敢食。」

由於寫出了知名度，現時不少餐廳也會主動邀請Jessica試食，好讓她在Food Blog內美言一番，但她從不吃免費午餐或收取酬勞寫鱔稿：「我寫嘅評價都係出自真心，試過某間餐廳寫電郵畀我，叫我刪除其中一篇有關該餐廳嘅食評，因為我寫到啲食物唔值咁貴，佢哋話會補償我，但我同佢講唔需要畀好處我，我亦都唔會刪除篇文。」她知道經營一間餐廳不容易，要投資大量人力物力及心機，故她不會寫得太尖酸刻薄。

肥和瘦的掙扎

擁有Food Blogger及模特兒雙重身份的Jessica表示，兩者有微妙衝突，因為Food Blogger要不停試食，但模特兒又要有弗爆身材：「有一排真係食到肥咗，但後來我控制飲食，如果知道夜晚會食大餐嘅話，午餐就食少啲或者食多啲菜，或者前一日食多咗，第二日就食少啲去平衡番，但每次食嘢我都會好享受，當然仲要加埋做運動啦！」