馬德鐘及梁烈唯等昨日為無綫劇《飛虎Ⅱ》拍攝宣傳片。馬德鐘笑言下輯要歎陽光海灘，而梁烈唯則自爆扮飛虎隊時熱到濕晒，要密密換底褲！

梁烈唯（左）及馬德鐘拎住支槍扮型，但事實熱到出晒汗！

不用拍攝時，梁烈唯即要吹風扇抖涼。

袁偉豪笑言每次着制服便會出太陽。

馬德鐘、梁烈唯和袁偉豪昨日在啟德郵輪碼頭拍攝無綫新劇《飛虎Ⅱ》宣傳片，而劇集將於下月19日晚上9點首播。

問到烈日下拍攝宣傳片會否辛苦？馬德鐘笑說：「唔知當日點解完成到，竟然仲健在，回想番好恐怖。」如果有第三輯，他笑言希望可以出埠拍：「去陽光與海灘嘅地方，但突然有重大嘅Case要出動。」他坦言想公司慰勞，去邊則冇所謂：「有得一班人已經好開心。（長洲？）咁又唔好，起碼要坐飛機。」

預告炸到飛起

至於梁烈唯透露宣傳片中所有人都會炸到飛起：「得英勇嘅飛虎隊係腳踏實地！」又稱雖然練得一身耐熱能力，但最怕出汗整濕底褲：「帶定多幾條底褲囉！」同劇的袁偉豪則熱到滿頭大汗，更笑說：「其實好得意，每次着住套制服，太陽就會出現！」