周柏豪前晚在個唱中赤裸上身大騷健碩身材，並與兩位性感女舞蹈員上演「人肉三文治」，任由兩女摸勻全身，認真艷福不淺！

周柏豪

一眾女舞蹈員摸勻柏豪全身，而他亦似乎幾受落！

柏豪緊張拖偶像祖兒手仔合唱（圖），其後又與好友鄭融Jam歌。

鄭融、柏豪

周柏豪一連兩場處男紅館騷《Colors of Life 2014演唱會》前晚開鑼，吸引其父母、圈外女友Stephanie、鄭融及前緋聞女友鍾浠文等捧場，無懼女友扭耳仔的柏豪與兩位三點式女舞蹈員大跳辣身舞，兩女上下其手喪摸柏豪胸部及大髀內側，超出視覺極限！

攬祖兒硬晒軚

而任嘉賓的容祖兒甫出場即掀起高潮，並合唱柏豪為她作曲的Hit歌《天窗》，細心的祖兒伸手為其抹汗，視祖兒為偶像的柏豪相當怕醜，未敢擁抱對方，最後由祖兒主動張開手攬他，祖兒笑說：「好少做比我年資細嘅歌手演唱會嘉賓。」氹得柏豪笑說：「多謝你送呢份大禮畀我，唔知點報答你，死喇，我亂晒。」祖兒即搞Gag回應：「你係頭髮亂晒！」又大讚他有上進心、靚仔又有才華。

另外，柏豪又即場拉好友鄭融上台合唱《一事無成》，並親吻答謝對方。疼錫歌迷的他又即時除去手錶送贈歌迷。