王梓軒堅守樂壇誠意搭夠
王梓軒出道五年,星途半浮半沉,獨立公司出身的他見盡樂壇潛規則,被打壓過、受挫折過後,幸有緋聞經理人石祐珊帶領走出陰霾。梓軒決定還原基本步,用七位數打造科幻音樂電影,用音樂勉人勵己。
王梓軒慨嘆樂壇充滿潛規則,惟有用誠意感動人。
王梓軒豪花七位數炮製新歌MV,認真大手筆!
歌手王梓軒早前為拍攝新碟封套,攀山涉水到郊外瀑布取景,成功練得一副爆肌身材的他,穿上西裝大玩濕身誘惑,實行派六舊「朱古力」益歌迷。梓軒亦為新歌《千色》與荷里活班底炮製最新科幻音樂電影,台前幕後豪花七位數!在音樂電影中,梓軒本來活在刻板的黑白世界,最終如夢初醒,尋回彩色世界。他希望今次能帶出「大膽追夢」的訊息,鼓勵自己之餘,又可以為別人打氣。
生於富裕之家的梓軒表示,曾被灌輸要過刻板生活,在高薪糧準的銀行工作:「有人會叫我讀完書一定要做呢啲嘢,但其實我只係追緊人哋畀你嘅夢,最後我夠膽Say No,夠膽去試音樂呢行。」
曾諗過放棄
加入五光十色的娛樂圈後,梓軒卻又發現不似預期,慨嘆樂壇原來充滿潛規則:「樂壇有好多定位、級數、紅與唔紅、成功與否,好多呢啲準則。但我只想為音樂,所以先行番去起點,有人會話你傻,咁又點呢?我喺獨立公司好易畀人打壓,娛樂圈有唔同公司,一定要睇邊個拗得贏,或者有咩嘢同人交換,我哋從來都最少嘢去交換,惟有用誠意感動人。」見盡世態炎涼後,梓軒曾想過放棄,全靠緋聞女友兼經理人在身旁默默支持:「唔止一刻想放棄,全靠我經理人珊珊,佢會提我最初係點樣開始,會提番我入行時嘅目標。」