Ivy廚藝「舞」得彈

模特兒Ivy（禤嘉儀）早前有份參與以女英雄為主題的寫真集及擔任無綫世波女，更有「白淨莊思明」之稱！雖然不少人將焦點放在其35D驕人身材上，但原來Ivy多才多藝，運動及廚藝都相當耍家：「我好鍾意運動，但曬極唔黑，令人以為我係宅女，當年我係學界排球隊，狂跑圈、操體能，練到大腿肌肉太勁，畢業後想瘦啲冇再玩，但依家仲有教小朋友跳拉丁舞。煮嘢食方面，西廚同切魚生都有證書，趁後生咩都學吓！」問到家長有否投訴形象過於性感，會教壞細路？她說：「依家啲家長開放咗好多，佢哋仲話我趁青春可以再去盡啲！」