梁靖琪（Toby）昨日到沙灘拍攝無綫新劇，穿高衩泳衣的她大方晒線，同場卻遇上穿三點式的性感女演員，相比下略遜一籌，又要與拍檔在劇中咀到「甩皮」，慘！

於水中嬉戲的Toby大騷事業線，瘦咗依然有睇頭！

怕醜的Toby未埋位時以大毛巾遮身。

穿三點式的女演員活力四射，Toby即被比下去。

張頴康（左起）及周子揚等坐定定（目及）女，趁機消暑。

與性感女演員玩得投入的張頴康，驚唔驚老婆呷醋呢？

無綫藝人梁靖琪（Toby）、張頴康及周子揚等昨日到沙灘拍攝新劇《潮拜武當》，以一件頭高衩泳衣上陣的Toby，谷出深長事業線，與同場穿三點式的女演員對撼，略嫌輸蝕！尷尬的Toby受訪時自爆為保持最弗狀態，只靠排毒飲料「維生」：「不嬲都有做運動。（其他女演員比你性感？）佢哋好靚，咁嘅年紀啱o架喇，我未過到自己嗰關，本身又粗魯，盡量檢點啲。（縮胸着泳衣？）雖然瘦咗但都仲喺度！」

Toby透露在劇中色誘張頴康，並笑言「頂唔順」！劇組下月移師武當拍攝，屆時Toby要應付大量打戲，但她對體力充滿信心。有指好友周家蔚有意與無綫解約，不知情的Toby指她們不談公事：「只要佢開心，作為姊妹一定撐！（傳佢再懷孕？）係就好喇！我會多個契仔或契女玩，最近家姐第三胎都係仔，爸爸同姐夫有少少失望！（希望你生女？）順其自然！」

咀到「甩皮」

與Toby演情侶的張頴康自爆有幻想對方穿水着而流鼻血的戲份，問到現在對住Toby可有流鼻血？他說：「OK！好得，益大家啦！但都係老婆正啲，其實同佢都有場激吻戲，因為唔伸脷，大家咀到嘴都乾同甩皮。（冇伸脷？）唔得，老婆會鬧！」至於周子揚透露與張惠雅在劇中有咀戲，更有到飛鵝山車震的戲份。