JM高燒死頂暈住睇騷

文詠珊（Janice Man、JM）、內地女星白百何與潮人徐濠縈（阿徐）昨日現身巴黎出席Carven 2015春夏時裝騷，三人一碰面即雞啄唔斷。JM表示已連續兩日發高燒，長期處於暈陀陀狀態：「本來嚟米蘭、巴黎睇騷係優差，但係我將行程排得太密，每日瞓3、4個鐘，踩足成個星期咪頂唔順病咗！」她又稱靠意志力完成工作：「我冇時間睇醫生，惟有食成藥頂住先，應承咗嘅工作一定要做。」而極具派頭的白百何則獲品牌高層親自迎接，她表示並非首次飛到巴黎：「但睇騷就第一次，心情會比較輕鬆同享受啲。」至於阿徐則透露將於當地逗留九日血拼，隨後會立即趕返港跟女兒慶生。