歌手李治廷與內地女星范冰冰傳緋聞多時，至今仍未承認戀情，但早前兩人被拍得一同現身機場前後腳離開！此外，對於冰冰被空姐插爆態度差，李治廷則力撐「女友」，為她解圍：「我諗係個空姐問題！」　

祖兒大方透露想同師兄Plan個悠長假期輕鬆吓！

李治廷與緋聞女友范冰冰一直未肯承認戀情，但他們早前被拍得一同現身北京機場，更前後腳出閘離開。而李治廷前晚偕名模Amanda S.等出席時裝活動，他已經到達現場，卻不落車進入會場，李治廷解釋：「公關叫我唔好落住，同埋我專心用緊電話。（同冰冰傾偈？）唔係，我好鍾意車，睇緊車，仲有睇微博。好開心，我同黃齡合唱《北回歸線》主題曲係第一位，有人欣賞我嘅音樂。」

打入時尚500強

對於冰冰被空姐在網上插爆是態度差的藝人，他即維護緋聞女友：「冇乜可能！早前同佢宣傳飛來飛去，我覺得佢係最好禮貌嘅女演員之一。（當時你在場！）我唔覺，平時對工作人員唔止友好，佢個人好真，我諗係個空姐問題！」另外，冰冰日前被國際時尚網站列入全球時尚500強，連續第二年入圍的她更被大讚是世界上最成功的女演員之一。

祖兒「蜜」遊未盡興

而同場的容祖兒談及在英國拍攝《天然呆》MV，問到是否由男友劉浩龍（師兄）操刀？她說：「點解要懷疑係佢拍？當我助手冇到？的而且確，拍嗰個同剪片嗰個都絕冇怠慢。」繼而她轉移話題，慨嘆少時間遊覽，當記者叫她與師兄到當地旅遊時，她則說：「Plan一個長少少嘅旅行先，玩得盡興！」