徐子珊、張名雅及馬德鐘等昨日於馬鞍山為無綫新劇《以和為貴》拍攝外景，其中子珊投訴被德鐘調戲，對方則爆笑自認「冇厘正經」！

子珊投訴於新劇中被馬德鐘調戲，更笑指對方似足「鹹濕佬」！

名雅（左起）、子珊及千雪齊以短裙及短褲配高踭鞋晒美腿。

徐子珊、張名雅、馬德鐘（Joe）及朱千雪等昨日到馬鞍山拍攝無綫新劇《以和為貴》。前港姐子珊、名雅及千雪分別以短裙及短褲配高踭鞋鬥晒美腿，其中以誇張假髮及超短裙現身的名雅最「吸睛」！問到身為師姐的子珊與師妹合作可有火花？她說：「合作冇壓力。（過料？）邊敢呀？仲有美儀喺度！」她又自爆為飾演調解員而下苦功「刨書」。

笑名雅「剋星」

談到於劇中與馬德鐘相戀，子珊即「投訴」被對方調戲：「佢做前蠱惑仔，講嘢好輕佻，成日調戲我，好似鹹濕佬！」更笑稱於劇中被「激到抽筋」：「名雅係我老公嘅小三，佢係我剋星。（激出皺紋？）淨係畀馬德鐘調戲都激到扯氣同抽筋！」而名雅亦爆會與首次合作的Joe於劇中「攬頭攬頸」。

爆肚搞Gag

對於被子珊投訴，Joe笑言於劇中「冇厘正經」：「我調戲得佢少啦！反而名雅仲多。我個角色冇厘正經，不過得把口，最多會窒同埋笑人！」問到鏡頭後會否同樣「糟質」子珊？他大爆二人在劇本中加插「笑料」：「我哋會加啲Gag位，笑到要停機再拍。」談到於劇中被眾女包圍，Joe即盛讚三女：「唔止港姐，仲有港男翟威廉，套劇由子珊帶住我。（千雪同名雅？）唔怯場同一點就明。」