「巨聲3幫」季軍譚嘉儀入行3年，雖然最愛唱歌，但她百足咁多爪向多方面發展，主持、拍劇瓣瓣都有涉獵！她不僅要做唱得之人，更立志「操弗」演技！

譚嘉儀不斷作歌放上網，希望有機會出碟。

譚嘉儀恨做歌舞劇，更想挑戰奸角。

譚嘉儀和「巨聲幫」熟稔，更曾與林師傑拍劇。

提起「譚嘉儀」這個名字，你可會聯想到「巨聲幫」及「木偶妹」，雖然在歌唱比賽後，較少機會在公仔箱睇到她的演唱，其實只要Click入網上平台，即可欣賞譚嘉儀騷歌藝，翻唱其他歌手的歌曲，或演繹自己的作品，令人聽出耳油無限Loop！譚嘉儀默默耕耘，操好音樂底子靜候機會出碟，她說：「有Keep住作歌，但自己作詞就弱啲，兩方面都有鍛煉。我之前作咗首歌叫《閉幕詞》，都有好多正面回響，希望首歌成功派台。一直放歌上網，希望遲吓出到一張屬於自己嘅專輯。」

唔怕戲路被定型

愛上演戲的譚嘉儀就算做戲都想與音樂拉上關係，一嘗做歌舞劇的滋味：「我未試過歌舞劇，喺舞台上唱歌又演戲，嗰種台上面嘅張力同影響力係多啲，講講吓嘢又無啦啦唱歌真係好正！」26歲的譚嘉儀仍Keep住「妹妹仔」外表，但她不怕戲路被定型，更想挑戰做奸人堅：「唔怕做妹妹嘅角色，任何角色都係一個挑戰。如果有角色係外表妹妹仔，但內裏奸到出汁，我又好想試吓！」