英皇女藝人湯怡與譚耀文日前拍攝新片《我們停戰吧！》，於戲中發展師生戀的二人因為劇情需要，阿譚不但要上演胸壓湯怡的火辣場面，更要從後攬抱湯怡纖腰，搞笑之餘又夠晒Sweet！

湯怡和譚耀文在《我》片中發展師生戀，組合相當新鮮。

二人埋身肉搏的場面相當火辣，令觀眾引頸以待！

譚耀文奉旨攬實湯怡纖腰，認真好艷福！

有份投資《我》片的林文龍親自監場。

湯怡笑言幸得阿譚出手醫好她的「前輩恐懼症」：「我同阿譚喺戲度有啲親密場口，拍之前會緊張，因為我有『前輩恐懼症』，同前輩合作會驚到唔知點，但阿譚好好人，會主動溝通，令我輕鬆番晒！（同成熟男士演情侶有困難？）冇，我現實中都鍾意成熟男士，唔好睇我男友（洪卓立）外表好似好懦弱，其實佢好Man、好細心，又識照顧人，係我理想類型。不過我就未試過傾慕阿Sir，更加未試過師生戀！」

被湯怡叫做「前輩」的阿譚聞言說：「我又唔覺我係前輩喎！其實唔使分前、後輩，做足功課就唔使驚！湯怡都好勤力，走位同對白都記得晒。我同佢喺戲中係歡喜冤家，由嗌交開始，我個角色比較孤僻，今日呢個踢拖Look算係靚仔！」

林文龍撈埋幕後

當日沒有戲份的林文龍亦親自到場打氣，他說：「套戲我有份演仲有份投資，有時間都會落拍攝場地睇吓，做埋幕後，即係所有嘢都要兼顧，套戲都拍得幾順，成個團隊都好幫手，有信心會如期完成！」