有線「鬼王」梁思浩主持的靈異節目《怪談》達500集之多，可謂破了香港靈異節目集數紀錄。在新一輯節目中思浩要被落降頭，他一度罷拍，更指被落降頭後的經歷令他很不安。

思浩表示身為佛家子弟，難接受被落降頭。

思浩曾在節目中化死人妝。

思浩表示被落降頭後會很易中邪。

梁思浩主持有線《怪談》長達十年，與有線及節目監製已是感情深厚，但他在最近新一輯中要被落降頭，作為佛家子弟的他，覺得業戒難守，所以極之抗拒而一度罷拍，最後出動有線高層曾展章調停，揚言明年加人工才可擺平事件。

思浩事後受訪時表示，明白靈異節目有一定危險性：「乜嘢我都可接受，但降頭我真係接受唔到，落人降頭，會犯業戒，我係佛家子弟！當時我好嬲，發晦氣同監製講：『得喇！做埋呢輯唔簽有線。』搞到好大件事，曾生（曾展章）由細睇到我大，畀我好大信心，先令我肯做。因為我一直都好好運，唔想被落降好似被開咗個扇門咁，好易中邪！」

右手出紅斑

人在江湖身不由己，思浩接受了被落降頭，第三日便擔心到要睇醫生，他說：「我隻右手出現紅斑，不過我選擇信科學，認為自己只係食物敏感，所以跑咗去睇醫生，結果第二日啲紅斑就散咗，但呢個經歷令到我非常不安，成日隔半個鐘就沖涼。呢件事令我覺得幾無奈，因為我驚一種蟲卵嘅降，最恐怖，聽講當年有個無綫高層都試過被落呢種降，死後被解剖，滿肚都係蟲，幾得人驚，所以我唔會畀陌生人埋身！」