女神黃翠如雖有蕭正楠這位「大將軍」Mark實，但依然無礙狂蜂浪蝶埋身，搞笑的林盛斌（Bob）公然在微博「調戲」女神，可憐翠如BB「禮尚往來」送吻卻被寸「打尖」！

向來風趣的Bob玩得Talk得，日前他孖女神翠如BB工作時，竟當對方男友蕭正楠冇到，自拍咀女神面珠的借位相，並留言：「呢個姐姐仔幾索喎，整啖先！」翠如BB則低頭甜笑玩電話，未知是否正與愛郎談情說愛。事後玩得的翠如BB亦自拍回送香吻一個，並照辦煮碗留言：「呢個哥哥幾俊喎！整啖先！」

Bob卻招積回應：「呢位小姐，唔係唔畀你錫呀，但係下次可唔可以問吓我先呢？你知唔知有幾多靚女排緊隊等住錫我？你依家打尖，我好難同佢哋交代！」未知正排隊等啜Bob的美女是否其老婆及三個囡囡呢？