影帝黃秋生近月參演無綫新劇，並已抵上海準備拍外景。不過，他與無綫因住宿事宜爆發事端，據知秋生不滿要補貼住五星級酒店的差額，大呻「貼錢開工」，一度要先解決問題才開工，無綫則未肯讓步！

秋生因要自行補錢住五星級酒店而大發牢騷。

劇組在上海舉行拜神儀式，祈求拍攝順順利利。

馬國明與唐詩詠都認為公司有公司的規矩。

吳卓羲表示已習慣TVB的運作模式。

金像影帝黃秋生參演拍攝無綫新劇《梟雄》，與黎耀祥、馬國明及吳卓羲等合作，敢言的他埋怨是「貼錢開工」，近日劇組移師上海拍外景，秋生再連番遇上「不愉快事件」。秋生前日出發時，因颱風令航班延誤，被迫返歸，改於昨晨自費升級買商務機票飛抵上海，昨日秋生接受電話訪問時，直指航空公司處理航班問題交代不清，豈料抵埗後他再因住宿問題與無綫有爭論。

「唔通要拎錢嚟找數」

據知《梟》劇全體人員入住三星級酒店，若有人要求「升級」、「包房」或安排助手隨行，要自行補貼差價。惟影帝級的秋生不熟悉此政策，要求入住五星級酒店，亦不滿要自行補貼，他說：「入房又話啲房唔包，叫我自己畀錢（補差價），好奇怪！條件之前傾好，助手（費用）唔包冇問題，但要我畀差價？我留個半月，要補成七萬幾蚊，唔通要拎咁多錢上嚟找數咩，我帶十幾萬呀？我冇帶咁多錢上嚟，搵條命找呀？本來冇通告，今晚又要我拍一場，搞掂啲房問題先開工啦！一陣拍完返嚟畀人丟晒啲行李出去點算呀？我要求係好正常、合理，都係為工作，就算飛機搭經濟客位都係求工作方便，唔通叫我住150蚊啲房呀？我咁大個仔都未住過！演員要Share房，但我助手係女仔，點住同一間房呀？」

馬國明自認小演員

事件擾攘一段短時間後終解決，秋生答應繼續開工，有傳事件由經理人Mani出錢「擺平」，Mani對此拒作回應，但聲稱很多內地明星要求更多，秋生的要求只是一線演員的基本條件：「佢係畀面TVB先返去拍戲，拍開電影收貴好多，佢同TVB合作已經係冇要求。」

據知，無綫選擇三至四星級酒店，以便將房間改建成化妝或服裝間，五星級酒店均不容許此做法，而且無綫向來一視同仁，不論演員卡士都會被安排兩人入住雙人房。無綫藝員已適應此政策，同劇的馬國明說：「要求一個人房嘅每日係幾十蚊差額，唔需要補太多，不過公司向來出埠拍嘢超過三日嘅Trip都會有Pocket Money畀番，嗰條數其實都Cover番，咁都好啲嘅。（要求住五星級酒店？）唔使，我哋啲小演員，跟大隊就得。」吳卓羲表示有助手隨行，亦是自行補錢，已習慣TVB多年來運作模式。 唐詩詠則說：「每個製作單位都有唔同準則，之前去拍電影，係有啲舒服嘅環境。」