美國天后Rihanna前日在巴巴多斯與友人出海歎世界，更換上比堅尼泳衣玩浮潛，而前男友Chris Brown日前上節目戴上疑似Rihanna戴過的頸鏈，隨即被傳翻撻有望！

Rihanna日前回家鄉巴巴多斯探望親友兼出海歎世界，前日搭遊艇時更開心得親吻女友人面頰，認真童心未泯！其後她又換上黑色比堅尼，露出胸下的女神紋身圖案落水玩浮潛。自兩年前推出大碟《Unapologetic》後便遲遲未有新歌推出的Rihanna，有傳正為新碟錄音，準備在今年或明年初推出。

另一邊廂，曾於2009年虐打Rihanna的美國男歌手Chris Brown，日前上名嘴Jimmy Fallon主持的《The Tonight Show》節目，演出時戴上一條天使形頸鏈，有傳媒認出該天使吊墜與Rihanna早前戴過的非常相似，於是傳出二人再度翻撻！有人爆料指Chris與Rihanna的關係非常曖昧：「佢哋兩個有好深嘅連繫，對Rihanna嚟講，無論佢對住邊個都好，佢同Chris個名永遠都會交織埋一齊。」

後悔出拳　Keep住治療

而Chris早前受訪時自爆對打傷Rihanna深感後悔，至今仍每個星期接受兩次治療，令自己遠離「拳頭行先」的惡習。不過，Rihanna的密友亦向傳媒爆料否認他們舊情復熾：「傳聞係百分百流料，Rihanna已經冇同Chris講嘢幾個月，亦都冇打算再搵佢。全部網料都係老作博點擊率，Rihanna依家只專注喺事業同私人生活，而且佢同Drake都只係好朋友，唔係情侶。」看來Chris的現任女友Karrueche Tran亦要好好（目及）實男友！