向來貪靚的張敬軒前晚潮人上身，出動價值2萬港元、但被老鼠咬過的私伙爛衫出騷！其好友泳兒則化身美人魚公主，大晒「南半球」，挑戰性感極限！

軒仔所穿的皮褸看似爛蓉蓉，原來要成2萬蚊！

Kelly罕有地以大Deep V裝登場，為觀眾帶來新鮮感。

泳兒大玩透視誘惑，演出時更不經意放「峰」！

張敬軒、泳兒、李克勤及陳慧琳（Kelly）等前晚出席《英國保誠呈獻：迪士尼90周年音樂會》，輪流演唱迪士尼童話故事的經典金曲。軒仔換上多個造型演出，更出動大量私伙靚衫，包括爛褸落力獻唱！泳兒則身穿性感程度爆燈的藍色美人魚公主裙登場，胸前的透視設計盡顯其美好身段，獻唱時更大出「峰」頭！

巴黎「鼠」輩橫行

受訪時，軒仔透露其私伙貴價爛褸價值約2萬港元：「之前喺巴黎買咗呢件爛褸，都要2萬幾蚊，因為真係畀老鼠咬爛嘅，但當然蒸過晒冇菌啦！」提到他為泳兒揀選的美人魚裝極為性感，他即大讚對方身材好：「好多女仔都希望有機會着公主裙，佢又幾有本錢，冇所謂啦！」泳兒亦認為戰衣合身：「已經改咗Size，係咁o架！難得有咁嘅機會，第一次着到咁行！」問到日後結婚時可會如此性感？她笑說：「要問隔籬嗰位接唔接受到！」

克勤自嘲老餅

另外，擔任嘉賓的李克勤在台上笑說：「為免小朋友唔識我，我係克勤哥哥，或者叫叔叔都得！」他又笑稱被歌詞考起：「平時記歌詞叻叻聲，成日奚落身邊嗰個（譚詠麟），佢就話『他朝君體也相同』，今次領略到，啲英文歌歌詞勁難記！」問到老婆可有抽空陪兒子唱歌？他笑說：「如果佢唱我唔使出嚟做啦！」至於Kelly則未知是否怕被追問弟弟陳司翰背女友偷食一事，竟罕有地拒絕受訪。