Babyjohn（左起）、李梓宸、張兆輝及邵音音等齊齊謝票，力谷票房。
藝人張兆輝前晚專程由上海回港，與李梓宸及蔡瀚億（Babyjohn）等演員到觀塘為新片《恐怖在線》謝票，對於有投資方欲開拍續集，眾人均大感興奮，輝哥說：「有傾過開續集，但我出年至有期。我本來喺上海拍劇，今晚都係特登返香港，之前幾次謝票都唔喺香港，邵音音話謝票謝到好攰，觀眾又話想見我，所以咪親身返嚟多謝佢哋，聽朝我又要飛返去開工喇！」
混入戲院的張兆輝及Babyjohn與觀眾打成一片，帶動全場氣氛！
李梓宸則期待再合作：「電影有穩定票房，我好驚喜！導演有說過再合作拍片，我不用再扮鬼，將會是個懸疑故事，輝哥明年才有空，我們會等他！」Babyjohn席間大講靈異經歷：「尋晚聽中學同學講先知片中講巴士墮橋單意外，我班同學現實中差啲就係巴士上嘅乘客，當年我哋畢業聚餐完，有同學追巴士好彩追唔到，否則就會上咗嗰肇事巴士！」
