去年公開性取向的王賢誌（Vinci），身邊有位相處五年的同性密友C君，但他甚少提及對方，前日Vinci與C君現身中環撐枱腳，身材高大的C君、髮型有點像金秀賢，席上見兩人有說有笑，認真Sweet！醫肚後，Vinci與「肌版金秀賢」C君繼續在附近行街。

Vinci（右）邊食嘢邊望實C君，杯嘢飲唔落糖都覺得甜。

說笑過後，Vinci（右）和C君齊齊低頭玩電話。

Vinci（左）走在前面，密友C君貼身跟實。

現年43歲的王賢誌，本身為「王氏港建」太子爺，坐擁家族50億事業王國，又是東華三院總理，稱得上是城中筍盤。出道以來甚少緋聞的他，不時被拍得與同性耍樂，性向成疑。去年Vinci接受電台訪問，終於打破緘默，公開性取向，自爆38歲才初戀的他，透露當年在派對上經朋友認識另一半「C君」，兩人一拍即合，感情發展順利並火速共賦同居。

前日下午5時半，戴住帽的Vinci與C君現身中環一間餐廳醫肚，C君身材高大健碩、梳了一個金秀賢髮型，相當Cutie。他們面對面坐，席上有說有笑。醫肚後，雙雙步行離開並繼續在附近行街。據知，Vinci早前入了醫院，當日才出院，對方就帶他去開餐。Vinci較早前於微博上載穿上病人衣服，身在醫院的照片，並寫上：「又禁食又放瀉...終於捱過，沒有大礙，重新開始。」

歐洲食出胃膜炎

昨日記者致電Vinci慰問，他說：「因為我之前去歐洲狂食，回來之後竟然瘦咗，依家得番140磅，係二十年嚟最輕，所以入醫院照腸胃，好在報告出嚟係胃膜炎。」

曾對婚姻充滿憧憬的Vinci表示，希望在香港舉行大型婚禮，記者問到婚禮進展如何？他說：「冇乜新進展，都係咁啦！暫時冇乜變化。」可見他們感情穩定。