混血名模Rosemary早前宣布與中印籍富商男友Jason明年春天拉埋天窗，正準備婚禮與經營生意的她忙到兩頭騰！但她顯得樂此不疲，笑言對新生活充滿期待，更不時以最愛的日本菜犒賞自己。身為模特兒的Rosemary非常為食，與Jason有共同嗜好，更指男友經常在家中擔任大廚，令她有口福！

Rosemary愛歎日本菜，不時與男友四出試菜。

Rosemary亦有「港女」一面，品嘗和牛壽喜燒前先與日本直送食材影靚靚合照。

Rosemary先以和牛牛脂熱鍋，務求以天然油分煮出香味，再將烹煮需時的蔬菜下鍋。

其後倒入由師傅以吟釀與野菜熬製的壽喜燒醬汁。

待醬汁煮開後，Rosemary放入壽喜燒主角飛驒和牛，新鮮和牛稍為在鍋中涮一涮即可入口。

Rosemary笑言被三色素麵的粉色麵條吸引，將店員提供的配料加到秘製醬汁中，伴隨素麵品嘗。

Rosemary經常邀請一大班朋友回家開Party，由男友一手包辦食物。

Rosemary（左）日前遠赴巴黎，與設計師見面商討合作。

Rosemary開設公司在網上租手袋，外間反應不俗。

名模Rosemary即將步入人生新階段，早前宣布與男友Jason於明年結婚，同時為新事業四出拚搏。為了補充體力，最愛日本菜的Rosemary日前抽空到銅鑼灣品嘗正宗和牛壽喜燒，熱衷亞洲文化的她更向店員請教正確步驟，食得招積非常！Rosemary加點外形搶眼的三色素麵，盡顯少女心，但身為模特兒的她「辯稱」是為了飲食均衡。問到與Jason約會是否專攻日本菜？Rosemary笑指日本菜亦是男友的「飛佛」：「我哋都好鍾意日本菜，特別係壽司、刺身，今日就要試埋個壽喜燒！」並踢爆男友有不少「私竇」，不時帶她四出試菜見識。

Rosemary與Jason在飲食方面相當志同道合，問到有否「學整幾味」綁住男友？她自爆男友才是家中大廚：「都係佢煮我食多，因為佢好鍾意煮嘢，佢煮嘢食好叻，Amazing！雖然我都學過幾招，但都係比唔上佢。有時間都會煮畀佢食，覺得好享受個過程。（男友讚你？）佢話麻麻哋！佢係講真話嘅，佢想我可以進步！」

嗜辣愛麻辣火鍋

有一位印度籍男友，餐桌當然少不了咖喱，但Rosemary坦言初時對咖喱有些抗拒：「原本我唔係好鍾意印度菜，佢屋企人好鍾意搞Indian Night，男友媽媽會煮印度菜，佢做嘅咖喱令我愛上。（鍾意食辣？）我平時食好辣，除咗日本菜，仲好鍾意食四川菜，最鍾意麻辣火鍋！」

談到Jason，Rosemary喜上眉梢，甜笑分享與男友的生活點滴：「佢好享受煮嘢食，經常請一大班朋友上屋企開Party，去年聖誕節我哋搞咗個Ball，有30幾個朋友上嚟，嘢食由佢一手包辦！我就做咗佢小助手，喺旁邊幫手抹枱同執嘢，仲做埋服務生，幫佢招呼朋友，我哋好似一個Team咁！（婚禮宴客食物由男友煮埋？）佢負責張羅飲食，我就負責安排場地，希望用最好嘅嘢招待朋友。（婚禮由你話晒事？）唔係，我哋好Enjoy分工合作。」

網上租手袋贏好評

Rosemary與男友感情穩定，但之前沒有結婚衝動，如今計劃步入教堂是因為有了新目標：「我哋感情好似結咗婚咁！其實會決定結婚，係希望早啲為生小朋友做準備。（身心都準備好？）婚禮之後會開始Plan，不過我哋都忙，啱啱開咗公司做網上租手袋，生意都唔錯，之前仲飛咗去法國巴黎見設計師同睇新產品。身邊朋友好鍾意呢個概念，反應好好，喺亞洲係一個好創新嘅時尚生意。（男友有畀意見？）佢都接觸咗好多名人朋友，仲幫我介紹生意。」