「巨聲幫」的許廷鏗（Alfred）近日成為男士纖體瘦身產品代言人，別開生面不用騷肌，僅以魔術師、醫生等專業造型拍廣告，雖然有美女Model露背上陣當拍檔，但他卻未能享福，皆因兩人分開拍攝，Alfred只能靠想像觸摸，笑言沒失望，因酬勞相當和味，對他成為有樓人士又邁進一大步！

Alfred揮動手上的魔術棒與女模拍攝，毋須騷身材及人魚線。

化身魔術師的Alfred要把一位身材略胖的女子，以魔術把她變得身形纖瘦。

Alfred與美女Model合作拍廣告，輕輕鬆鬆賺大錢。

向來有少許肉地的許廷鏗，最近以6位數字任男士纖體瘦身產品代言人，日前更化身魔術師與女模拍廣告，只見他不停揮動手上的魔術棒，以及輕撫女模面龐，毋須騷身體線條及人魚線，令Alfred不用為廣告特別減磅，便能輕輕鬆鬆賺大錢。

自從被外間以「脹爆」形容後，Alfred終於的起心肝做運動，以跑步及做Gym來減磅，但效果始終未如理想：「因為以前踢波，對腳係會犀利啲，所以做Gym令上身可以大隻啲，咁成個Body比例會好好多。」為配合Magic主題，化身魔術師的他要把一位較肥的女子，以魔術把她變得身形纖瘦，Alfred透露有一幕他要觸摸女模背部，對此大感緊張，其後經工作人員講解後，才得悉只是一場誤會：「原來唔使直接摸，我哋會分開拍，之後用後期製作交代。（失望？）唔會，反而放下心頭大石，不過我冇女友，都唔使備案。」

問到擇偶條件較喜歡有肉地還是纖瘦的異性？Alfred竟表示會選擇前者，皆因擁抱時有質感一點比較好。談到廣告中毋須騷身段，酬勞方面會否相對減少？他說：「咁又冇，仲好滿意添！反而覺得幾得意，相信我係史上拍纖體廣告唔使除衫嘅第一人，除衫太氾濫嘞！同埋呢隻產品只係搽，唔係內服，好似危險性冇咁大。」

大量產品贊助

已先後為不同產品拍廣告的他表示，除荷包腫脹外，亦獲大量產品贊助，基本上生活無缺，問到是否有入冇出？Alfred抵死地說：「係囉！好開心，但我又唔會嫌多，咁我都有畀家用，剩番嘅錢會儲嚟買樓，我一直同屋企人住，錢就由父母幫我管理，佢哋有教我投資，想我早啲『上車』，其實首期我都夠，只係物色緊地方，睇啱就買，咪當做投資囉！」