史上最高彩金的六合彩攪珠將於明天舉行，估計彩金將破紀錄高達1.5億港元，全城掀起投注熱！歌手糖妹、模特兒傅嘉莉亦不甘後人試運氣，糖妹先向鴻運當頭的老闆取經再落注，傅嘉莉則隨心揀「冧巴」，二人異口同聲揚言中獎後會將一半彩金做慈善。

糖妹到自助售票機購買彩票。

糖妹「計劃」周詳，已想定中獎後開環保主題的巡唱。

傅嘉莉「重錘」買八個字的六合彩票，彩票到手後更即錫番啖！

傅嘉莉

糖妹昨日中午到公司附近的尖沙咀投注站買六合彩，她表示平日與家人夾份，今次親自到投注站，她劃好心水號碼後，見人龍幾乎排到出門口，於是往買一張現金券用自助售票機購買。問到投注心得，她笑言近年公司腳頭好，所以有事先問同事意見：「我買咗兩注，一注係同事一人畀一個冧巴，另一注就係自己嘅心水，我哋老闆成日都中，所以有問佢意見。」只買廿蚊的糖妹實行「刀仔鋸大樹」，講到如果中頭獎，她興奮地說：「首先要將一半捐出去，剩番嗰一半想用嚟做音樂，到時巡迴舉行Live騷，帶埋同公司嘅若琪、享樂團一齊去，騷嘅主題要講環保，因為啲錢係社會嚟，要做番啲回饋社會嘅嘢。」

幸運數字貼6、16

而模特兒傅嘉莉（Kelly）昨日穿露腰裝到投注站，鮮有買六合彩的她落注後更即場親吻彩票「加持」，似想增加運氣，她說：「今次真係人生第一次買8個字嘅280蚊飛，之前根本唔知可以一次過揀8個號碼，頭先劃飛都劃錯欄位。」講到心水號碼，她說：「由細到大6號都係幸運號碼，我生日係6號，細佬生日係16號，至於其他就隨心，8、18都有，有『發』嘅意思。」她坦言並不貪心：「唔一定要頭獎，不過我諗自己之前發生交通意外都冇事，大難不死必有後福。」她自爆曾於澳門贏過5位數，至於如果今次中了頭獎，她說：「首先會買磚頭（屋）畀自己同屋企；第二就係成立一個關於小朋友同老人家嘅基金，同埋關注依家社會上罕見疾病。」