內地打星張晉與老婆蔡少芬日前在元朗某停車場掉頭偷位泊車，期間一度與迎頭車輛「頭對頭」，惹來對方不滿，指他在停車場中逆線行車，更將有關片段上載到Facebook。張晉昨日接受電話訪問時認為整件事只是誤會。

張晉及Ada被轟在停車場逆線行車偷位泊，二人即解釋只是一場誤會。

昨日有網民把張晉及老婆蔡少芬（Ada）在元朗某停車場中泊車的片段上載到Facebook，指對方逆線行車：「逆線行車不止，仲要我讓她，要我倒車畀佢逆線行。大佬，我後面都有車頂住。雖然明星有揮手言謝，但安全第一呀！」該片段中，張晉的座駕正掉頭偷位泊車，但未有打死火燈，僅揮手示意，期間Ada落車為老公指揮及言謝。但張晉掉頭時卻一度與迎頭車輛「頭對頭」，該車亦只好後退讓路。

網民力撐「小事」

張晉昨日接受電話訪問時表示，事件只是一場誤會，語氣平靜的他說：「當時我泊緊車，但個車位本身有幅牆擋住咗，所以我要掉轉頭去泊，同時有另一架車迎頭駛嚟，可能因為咁誤會咗我逆線，我都有揮手示意，希望對方等一陣，Ada都有落車唔該對方。」問到會否因而怕了街坊，他笑說：「冇辦法，我又冇做錯，都已經盡量解釋番，解釋唔到都冇辦法，最重要問心無愧。」

而網民普遍認為事件影響不大：「好小事啫，停車場成日逆線，人哋都唔該咗你」、「十個有九個喺停車場都會逆線行一段仔路o架啦！」但亦有人斥張晉的做法不妥：「一，停喺斜路阻住後面，人哋要爬頭上。而爬頭係極危險，因為佢阻住人視線。二，佢唔守規矩，人哋正常順住行，佢打尖泊咗人個位。三，阻住晒要離開車場嘅人。」

聲稱只是誤會

另外，Ada昨日亦透過短訊回覆，指對方可能以為他們想霸位才「逆線」行車：「因為我哋架車大，車頭入唔到，尾入又會撞牆，要逆線偷位先泊到，可能對方以為我哋想霸位先咁做，但其實我哋最初泊位嘅時候後面並冇車跟住，只係誤會。」