上屆港姐亞軍蔡思貝被指是「新一代姣精」四出獵仔，昨日《好報》踢爆她最新目標是楊怡男友羅仲謙，昨日她更揚言稍後雙雙到台灣拍外景，都不會避忌！

蔡思貝

楊怡與羅仲謙的姊弟戀早已為外界受落。

《好報》踢爆蔡思貝睇中同劇的羅仲謙，展開姣溝攻勢。

蔡思貝入行一年緋聞多不勝數，被指是「新一代姣精」。最新一期《好報》踢爆她睇中童顏巨胸的羅仲謙，二人最近合作拍新劇《衝線》，思貝不時向謙仔放生電！知情人士更說：「佢明知謙仔有楊怡咁大個視后女友，一樣當佢冇到，好多人勸過佢唔好玩火，但佢好似當耳邊風。」

日前思貝、謙仔、沈震軒及溫家偉等到欣澳拍外景，思貝經常擰轉面撩謙仔傾偈，但發現記者後即黑面，更刻意避開男人堆，改為與女演員坐在一旁，但明顯悶悶不樂。其後她受訪時提到謙仔卻又情不自禁大讚：「佢好Nice，多嘢講，好快就混熟。」至於謙仔亦不避嫌拿思貝開玩笑，笑她踩單車最渣，但不忘讚她是聰明女。

據知，思貝向來鍾情大隻運動男，對謙仔零舍嗒糖，有劇組人員指謙仔不在場時，思貝即跌晒Watt冇晒心機，但謙仔到場後她即上電，嗲聲嗲氣拋眉眼，更主動約食消夜，起初謙仔刻意迴避，但最終亦首肯，開始把持不住的他日前連女友楊怡生日P亦冇影，感情似乎生變。

稱同楊怡有偈傾

對於被指姣溝謙仔，思貝昨日接受電話訪問時例牌唔認：「一開始拍劇都預咗，希望幫到套劇宣傳。（驚唔驚楊怡唔高興？）唔會，喺化妝間成日撞到，有打招呼傾偈，佢都知唔係事實。（近期多緋聞？）成套劇都係男仔，我諗要自閉先冇緋聞。（驚唔驚去台灣拍外景再傳緋聞，會避忌啲？）大家係朋友，唔需要避忌。」