黃俊銘打出一片天

夏雨兒子黃俊銘（Dixon）去年遇上賊人入屋爆竊，當時以一敵二的他，原來已學習跆拳道逾十年：「其實斷斷續續都學咗十年以上，我細細個喺溫哥華度學，中途因為返香港學中文而停過，之後返加拿大後又再學番，嗰時開始真正鍾意跆拳道。可能本身有少少天分，所以覺得跆拳道幾易上手，亦畀到我成功感。」現為黑帶三段的Dixon曾奪得表演比賽冠軍及代表加拿大出賽，本身亦有教跆拳道的他卻無意再考更高段數：「我記得四段以上就係師範，可以開分館去教人，但我資歷唔係好深，之前又要專注學業，依家仲入埋行，所以都冇打算考。」

曾逃避返港

自小醉心跆拳道的Dixon曾立志成為武打明星，但最終打消念頭，一心向電影發展的他更以「星二代」謝霆鋒為奮鬥目標：「我覺得我同謝霆鋒有幾多相似之處，大家都係由溫哥華返香港，喺入行前又曾經掙扎過，又同樣係星二代。」但無法適應香港生活的Dixon更試過逃避回港，不過爸爸夏雨的一席話卻將他點醒：「我以前喺加拿大係做銀行，每日返工都做同樣嘅嘢，生活好穩定同死板，所以初時返到香港就適應唔到，覺得好唔穩定。但Daddy就同我講：『咁後生做咩要穩定？應該要趁年輕未有包袱嗰陣，去做你想做嘅事，試多啲唔同嘅嘢』，所以我就入咗行。」