馬來西亞男歌手品冠兩年幾前結婚，火速造人並誕下一對子女。擁有美滿家庭的他原來有「恐婚症」，但被太太無微不至的照顧打動而衝破心理關口抱得美人歸。太太分娩時他亦在產房陪伴，更以歌聲迎接兒女誕生。

品冠十分感激太太為他誕下一對子女，令家庭更圓滿。

家庭觀念重的品冠，認為照顧家庭責任重大。

品冠曾在台北個唱上送花給太太，好Sweet呀！

品冠於2012年與拍拖五年的圈外女友拉埋天窗，自言家庭觀念重的他原來起初有「恐婚症」，擔心責任重大：「喺娛樂圈咁多年，覺得自己仲未穩定，家庭生活離我有啲遠，心態上覺得未Ready，我覺得照顧家庭嘅責任好重，因為我家庭觀念好重，愈係咁諗嘅時候就愈會好認真看待，好似困住自己走唔出嚟咁。」

與太太拍拖多年，問到怎樣衝破這個心理關口求婚，他透露被太太的「痛愛」打動：「有次喺台灣拍劇整斷咗隻手，太太特登由香港飛到台灣照顧我，朝早佢幫我响雪櫃拎盒雪咗嘅蝦餃出來整早餐時，佢攞刀諗住整開啲雪凍咗嘅蝦餃時整傷咗隻手，我即刻送佢去醫院，縫咗十幾針。夜晚我拍完戲返到屋企見到佢包住隻手喺度幫我拖地，呢一刻我覺得再搵唔到咁好嘅女仔，所以我就向佢求婚。」

拒做怪獸家長

本來打算與太太過一、兩年二人世界的品冠，對於生小朋友亦順其自然，他坦言兒女出世時都有入產房見證感動一刻，更用歌聲迎接新生命誕生：「我覺得一定要入產房，咁重要嘅一刻要親眼迎接，我第一次入產房時，發覺產房比我想像中輕鬆，醫生仲叫我播自己嘅歌。第二次個女出世，同樣產房、醫生、助產士又叫我即場唱歌，所以我喺產房唱咗三首歌迎接我個女出世。」

他又指將來不會強求兒女繼承衣鉢，讓他們按自己的興趣發展，而他亦決不會做怪獸家長。