G.E.M.學車玩自拍捱轟

鄧紫棋人紅是非多，她在網絡上的一舉一動都成網民焦點，單是微博的粉絲人數已逾1,300萬人！如早前網上流出疑似艷照，以及上載家中開放式廚房疑似明火煮食的照片，都成網民熱話。昨日G.E.M.網晒「第一次」照片，上載一張在汽車駕駛座拍下的照片留言：「下雨天，第一次在馬路上開車，心如鹿撞，哈哈哈哈！」隨即再惹網民熱議，有近1萬個留言，有網友質疑她揸車時使用手提電話疑似違法：「請問在路邊開車可以邊開邊拍照？視他人安全不顧，這樣是違規嗎？」亦有不少粉絲擔心G.E.M.的安全：「睇路呀！唔好顧住影相！」

搬運輸條例反駁

對於網友質疑，記者昨日致電求證，G.E.M.表示當時正在學車，在停車等待轉燈及教車師傅允許下才拍照：「我影嗰張相嘅時候停緊紅燈嘅，咁嗰陣時候呢我學緊車，咁我個阿Sir就坐喺隔籬，咁我問佢話依家紅燈咁我哋又唔開車，我可唔可以影一張相，佢話可以，我先至影嘅。」G.E.M.又表示曾在運輸署網頁中查閱，認為未有違反交通規則，她說：「同埋上埋運輸署嘅網頁，睇番其實佢係有講到嘅，第五條：如司機在其所駕駛的車輛停紅燈時、塞車停下時或停泊在路邊時以手持方式使用手提式流動電話，會否違反新法例？答案係不會，因為新法例只適用於當車輛行駛時，所以其實我係冇違反交通規則o架囉！」

未熄匙隨時違法

記者昨日致電梁永鏗律師，問到G.E.M.表示得到教車師傅允許才拍照，他說：「師傅未必熟悉法律條例，佢話可以都唔代表冇犯法。」至於G.E.M.表示運輸署網頁，駕駛汽車安全指引中「常見問題的答覆」的第五條，梁律師指存有灰色地帶：「唔影響駕駛下係可以用（電話），但喺紅燈時架車未完全熄晒，架車係隨時可以郁得番，喺咁嘅情況下，你拎部電話出嚟用，甚至影相，都係隨時違反法例，最高刑罰罰款2,000蚊。」另外，G.E.M.日前現身北京，為腕錶品牌TAG Heuer擔任特別嘉賓，穿白色連身裙青春迷人，即場獻唱多首名曲，台下觀眾舉起手機狂影。