鍾鎮濤與范姜在一眾巨星賓客見證下結束17年的愛情長跑，群星於前晚開始陸續回港，昨午在機場登機時，志偉獲女Fans索合照，人氣竟然鍊贏透黑Bra的女神張曼玉！

曼玉唔介意人氣輸畀志偉，大方搭膊合照。

曾志偉（左）

晚宴結束後，范姜與眾賓客乘車返酒店。

陳國熹玩到碌出座位，好彩有葉童捉實！阿B更笑到收唔到聲！

杜德偉夫婦以情侶黑超Look現身機場。

杜德偉幫邱淑貞扶好沈晨。

沈家偉、邱淑貞一家大細登機，沈晨等到嘴扁扁。

沈晨

學友（左）和張家輝大讚婚禮感動。

鍾鎮濤（阿B）與范姜在峇里的婚禮前晚圓滿落下帷幕，張學友、張家輝和周麗淇前晚率先回港，昨午二時，其他出席的巨星亦盡興而歸，其中以帶頭的曾志偉在峇里機場最受歡迎，不停被女Fans「集郵」，風頭蓋過張曼玉、邱淑貞及周汶錡等女星，問到與女星一齊搶花球的羅志祥是否好恨結婚？他笑說純粹覺得好玩。其後邱淑貞一家、上山詩鈉、杜德偉和葉童等隨大隊現身，邱淑貞的細女沈晨超級搶鏡，全程紮紮跳，杜德偉更將她抱到行李篋上，認真可愛！最後張曼玉壓軸出場，透黑Bra的她打扮相當醒神，不過全程表現低調。

陳國熹High到仆

前晚的夜宴結束後眾人坐車返回酒店，坐車頭的阿B見到記者即大方揮手，坐旁邊的陳國熹High到爆燈，用手機反拍記者之餘，更失去平衡跌出座位，幸得阿B及葉童快手捉住，最後陳國熹雖挨住葉童坐好，但又搞鬼地伸脷舉中指，旁邊的葉童就豎起手指公附和。

同是席上客的譚詠麟（阿倫）於前晚回港，並於昨日出席電台活動，他說：「見到阿B達標成功，好開心！」講到他被爆做證婚人時一口「爛」普通話？他解釋：「呢啲志偉講啫，因為關之琳話講普通話最熟，咪諗住一齊講普通話，點知之之未講已經喊晒，我咪講番廣東話。」至於有報道指阿B要賓客自付數萬元酒店及機票費用？阿倫默認：「有咩所謂，參加得都係自己人，阿B雖然叫翻身啫，但仔細老婆嫩，邊有計，嚟參加都係一齊分享開心氣氛，啲人點寫唔需要理。」而阿B則懶理負面報道：「唔使理啲報道，唔回應。」