謝賢女兒謝婷婷早前到菲律賓拍攝相集，因水壓及海水不潔，使長時間潛在水底的她眼球凸出，如同火燒！回港要敷類固醇膜，不過為了慈善，她毫不計較！

好彩婷婷睇完醫生已經冇凸眼，靚番晒！

婷婷和任達華一臉驚奇，搞笑！

謝婷婷和任達華昨日出席歐米茄Master Co-Axial機芯發布會，向來支持保育工作的她剛於菲律賓宿霧潛水回港，在當地拍攝鯊魚，曬得一身古銅膚色，問到可有驚險事？她滔滔不絕地說：「落機要坐三個鐘車去酒店，酒店再要坐兩個幾鐘飛機去潛水地方，因為要搵個冇乜人嘅地方，我哋凌晨三點就要出發！（有冇見到鯊魚？）有呀，成架小巴咁大！（驚唔驚？）唔驚，反而係個過程相當困難，又要同負責人申請，又要攞許可證，我要着住晚裝潛水，又冇得戴潛水鏡同氧氣筒，同行有啲人受唔到水壓隻耳流血，有啲上飛機就嘔！我要孭住三公斤嘅鉛落水，又唔夠氣，真係全世界最困難嘅事！」

敷類固醇膜治療

她表示這次拍攝工作全由男友戴尚安操刀，問到男友可有擔心她？婷婷透露自己因潛水而使眼睛受傷：「其實我都要去睇醫生，我後來睇番錄影，先睇到自己喺水裏面對眼好似金魚咁凸晒出嚟！因為唔可以戴潛水鏡，水壓加上啲水污糟，令到對眼好凸，依家要敷類固醇膜同食類固醇，對眼好似着火咁灼熱！」不過她表示為保育還是值得的。提到早前男友被拍得與女友人同行，被記者發現即彈開？婷婷即力撐對方，強調百分百信任男友。